DILI – Governu liu husi Sekretáriu Estadu Joventude no Desportu (SEJD) apresia ba servisu Médiku Konfederasaun Desportu Timor Leste (CDTL sigla portugés), ne’ebé mak akompanha atleta Selesaun Nasionál.
Lia hirak ne’e hato’o Sekretáriu Estadu Joventude no Desportu Abrao Saldanha ba jornalista sira hafoin simu audensia ho estrutura foun Konfederasaun Desportu Timor Leste (CDTL) iha eis sional Dili segunda (18/01).
Hafoin remata enkotru Abrao Saldanha haktuir, CDTL ohin aprezenta sira buka ona médiku ida ne’ebé mak agora daudaun asisti hela preparasaun ba jogu Sea Games no governu apresia ida ne’e.
“sira ohin aprezenta sira buka ona médiku ida ne’ebé mak agora daudaun asisti hela preparasaun ba jogu Sea Games no governu apresia ida ne’e. Ita seidauk iha médiku espesialista nian maibé médiku jerál ne’ebé mak iha ona ita Agradese atu nune’e bele fó atensaun ba ita-nia atleta sira-nia kondisoens” tenik Abrao.
Membru Governu ne’e hatete, CDTL mós iha ona médiku iha ona kalendariu no sira sei aprezenta fali kalendáriu para médiku ne’e vizita tuir orariu ne’e iha fatin treinamentu atleta sira.
“Iha timor la iha estandar médiku espesialista ba Desportu ne’e ita tenke realistiku ita hanoin katak tinan sira mai bele investe iha area espesializasaun médiku Desportu mais atu hatene nia kondisaun saúde nia bele treinu ka lae médiku ne’e bele” tenik SEJD.
Sexta feira (15/01) ne’e Konfederasaun Desportu Timor Leste (CDTL) hamutuk ho Governu liu husi SEJD ne’ebé reprezenta husi Diretora Alta Kompetisaun Maria Luiza Monteiru hala’o vizita dahuluk ba FTTL hodi haree besik atleta sira nia preparasaun. Hafoin atleta sira ne’e hala’o treinu médiku CDTL halo teste ba kondisaun saúde husi atleta sira.
Iha entrevista prezidente CDTL Macario Sanches informa ba jornalista hatete, katak Médiku ne’ebé mak sira lori mai ne’e médiku iha CDTL. Sira iha departamentu ida kona ba Desportu sientífiku no saúde.
“Médiku ne’ebé mak ami lori mai ne’e médiku iha CDTL ami iha departamentu ida kona ba Desportu sientífiku no saúde.tanba ne’e mak nia mai atu haree kondisaun atleta sira nia kondisaun prosesu Treinamentu nia laran ne’e saida mak nia persija inklui mós aimoruk sira ne’ebé mak persija konsumu no aimoruk neela bele konsumu durante prosesu Treinamentu” dehan prezidente CDTL Macario Sanches ba jornalista iha Sentru Treinamentu Tibar Liquica (15/01).
Macario informa, kuandu ba teste urin aimoruk ne’ebé lahatene konsumu de’it tuir estandar ne’e bele mosu inplikasaun ba sira nia moris nu’udar atleta.
Iha fatin hanesan atleta selesaun nasionál, Indrolia Amuri, espresa nia sentimentu kontente ho prezensa médiku hodi kontrola kondisaun saúde Atleta sira.
“Ba ha’u kontente tebes iha prezensa médiku rasik tanba antes ne’e ami treinu barak bebeik maibé ami la hetan team medis ruma atu bele mai kontrola ami hodi bele hatene ami-nia kondisaun saúde. Maibé ohin loron iha prezensa médiku nian ami sente kontente tebes tanba durante ami komesa treinu iha tinan ne’e hahu husi fila 3 to’o agora” Dehan Indrolia.
Charlly Junior
