DILI- Orgaun Liga Futebol Timor-Leste (LFTL) halo reuniaun ho prezidente klube sira husi primeira no segundu divizaun hodi halo evaluasaun ba liga futebol 2021, no elabora planu asaun ba tinan tolu.
Atividade kompetisaun futeból ás liu iha Timor – Leste epoka 2021 hotu tiha ona, ne’ebé hatur Karketu Díli Fc nu’udár kampeaun. Atu atividade bele dezenvolve diak-liu tan, maka parte LFTL kria enkontru dahuluk ho klube sira hodi evalua no buka solusaun ba kualker falla mak akontese iha atividade ne’ebé liu ona nomós rona ideia husi klubu ida – idak atu hariku liu tan ideia ba dezenvolve liga iha future.
“Ohin, inisiu fulan iha 2022, tanba ne’e ami konvoka reuniaun ho klube sira para halo evalusaun hamutuk ho sira kona-bá atividade epoka ne’ebe liu ona no rona mos klube sira-nia ideia hodi hamutuk bele elabora planu asaun ba tinan tolu liga futebol nian” Nilton Gusmão ba jornalista sira iha fatin reuniaun JL vila, Fatuhada, Dili sesta (21/01).
Tuir Nilton, iha enkontru ho klube sira para hodi bele enrikeza liu tan hanoin sira ne’e, depois sei organiza seminariu ida iha tempu badak para depois halo diskusaun dala ida tanba planu ne’ebe elabora ona iha loron ida ne’e no rona mos preokupasaun klube sira nian.
Iha fatin hanesan Prezidente Karketu Dili FC Adilson Ribeiro hatete, ohin enkontru halo evaluasaun ba atividade liga tinan 2021 no orgaun LFTL hakarak rona ideia husi klube sira para, atu sira prepara planu asaun ba tinan tolu nian hodi nune’e sira konvida klube sira mai fo hanoin hamutuk no tau planu hamutuk, sira hakarak rekolla hanoin husi klube sira nune’e sira tau planu tuir klube sira nia hanoin.
“Ohin orgaun liga konvida ami ohin enkontru halo evaluasaun ba atividade liga tinan 2021 no orgaun LFTL hakarak rona ideia husi ami atu sira prepara planu asaun ba tinan tolu nian hodi nune’e sira konvida klube sira mai fo hanoin hamutuk no tau planu hamutuk, sira hakarak rekolla hanoin husi ami nune’e sira tau planu tuir klube sira nia hanoin” Prezidente Karketu Dili FC Adilson Ribeiro hateten
Iha sorin seluk Prezidente Emamnuel FC Aleixo Carvalho Monteiro dehan, ohin enkontru ne’e klube sira hetan konvite husi orgaun LFTL mai halo evaluasaun ba joga epoka tinan kotuk no mos tau planu agora daudauk atu realiza liga, ne’e mak asuntu ne’ebe importante iha enkontru ne’e no hanoin katak liga ne’e atu la’o diak presiza komponente hotu husi klube, LFTL, FFTL ho SEJD ne’ebe mak suporta finanseiru ne’e importante la’o hamutuk para tinan ida ne’e liga futebol lao diak liu tan.
“Enkontru ne’e, ami simu konvite husi Orgaun LFTL, mai halo evaluasaun ba joga epoka tinan kotuk no mos tau planu agora daudauk atu realiza liga. Ne’e mak asuntu ne’ebé importante iha enkontru ne’e no ha’u hanoin katak liga ne’e atu la’o diak presiza komponente hotu husi klube, LFTL, FFTL ho SEJD ne’ebe mak suporta finanseiru ne’e importante la’o hamutuk para tinan ida ne’e liga futebol lao diak liu tan” Nia informa
Enkuantu enkontru ida ne’e foin primeira vez akontese hafoin transformasaun liga futebol amadora mai Liga Futebol Timor Leste tanbá problema saude mundiál pandemia covid-19. Iha ne’ebé partisipa husi klube 16 : Karketu Dili FC, As Ponta Leste, AD SLB Laulara, Academica FC, DIT FC, Santa Cruz FC, Lica Lica Lemorai, Assalam FC, Atletico Ultramar FC, Portu Taibesi FC, Emmanuel FC, Lalenok FC, Nagarjo FC, Fiel FC,Cablake FC no Lalenok United FC. No clubu 3 mak la partisipa Zebra Fc, Boavista Fc no Aitana Fc.
ADS
