DILI – Nilton Telmo Gusmao Santos, Kandidatu ida husi nain tolu ba prezidente Federasaun Futebool Timor-Leste (FFTL), hakarak halo mudansa bainhira decide hodi kandidatu an.
Atual prezidente Liga Futebool Timor-Leste (LFTL) Nilton Telmo Gusmao Santos hato’o asuntu ne’e hafoin remata enkontru ho prezidente no reprezentante klubu sira husi primeira divizaun no Segunda divizaun iha hotel JL Vila fatuhada Dili sexta, (21/01).
“ran foun ema foin sa’e nia espiritu diferente i sei bele haree diferensa. se ha’u ba para la halo mudansa di’ak liu ha’u hela nafatin iha Liga de’it di’ak liu” Dehan Nilton
“Ha’u hanoin Planu seidauk bele divulga, agora mais hanesan ita hotu hatene, ha’u depois deside kandidata depois de hetan Asosiasaun balu i ha’u konsiente buat sira ne’e la’ós fasil maibé ita haree tok oinsá mak ita bele tenta konvense ho votante sira, Asosiasaun sira, para atu haree buat ne’ebé ita atu lori programa sira ne’ebé mak ami prepara elabora ona para atu bele dezenvolve Futebool Timor ba dalan ida di’ak liu” tenik Nia.
Maske nune’e, kandidatu refere seidauk disponivél atu fo sai programa ne’ebé iha ba públiku. Maibé fiar an katak ran foun sei lori diferensa.
“Kada tinan, ita ba organiza buat ida di’ak liu tan, ne’ebé ha’u seidauk iha programa espesifiku atu fó sai, maibé ha’u disponivel ona para atu ba kompete ho kandidatu na’in rua seluk i ha’u respeita teb-tebes tanba sira senior iha Futebool maibé Ran foun espiritu foun ne’e ha’u hanoin sei fó diferensa” nia afirma.
Hanesan, kandidatura ne’ebé mai husi orgaun implementadór atividade futebool iha Timor – Leste, Nilton konsiente katak, nia iha koñesimentu diak kona-bá difikuldade oin-oin mak mundu futeból hasoru.
“Organizasaun Federasaun Futebool ne’e orgaun regulador, ha’u mai kedas hosi orgaun implementador ida, no ha’u hatene ona difikuldade saida mak Futebool ne’e hasoru hela. Ha’u hatene hela saida mak Asosiasaun sira sente hela ba Futebool ne’e tanba ha’u lori Futebool ne’e organiza to’o iha Baucau ha’u ko’alia loos de’it Asosiasaun Baucau” tenik Nia.
Demokratikamente, kongresu maka sei deside se mak merese atu tur iha pozisaun refere, liuhosi votu ne’ebé votante ida-idak hato’o bazeia ba programa ne’ebé kandidatu ida-idak prepara atu bele implementa hodi dezenvolve futebool Timor-Leste.
“Ha’u sei lori planu no programa sira ne’e iha apitu momentu kuandu atu halo divulgasaun programa iha kongresu laran mak ha’u divulga para depois Asosiasasoens municipal, Asosiasasoens distritais sira mak tetu se realmente ida ne’e mak di’ak, Prontu sira vota se sente seluk di’ak liu klaru sira tenke vota seluk tanba. ita nia objetivu ida de’it hakarak lori Futebool di’ak liu ba oin maibé ha’u hanoin raan foun foin sa’e sei dinamiku liu kompara ho ran tuan”, Nia hatutan.
Tuir lista kandidatura ne’ebé sei compete ba prezidente FFTL, Nilton mak ida ne’ebé kiik-liu kompara ho kandidatu seluk.
Kandidatu prezidente Federsaun Futebool Timor-Leste (FFTL) ba períodu 2022-2026 ne’e mak atuál vise prezidente AFF, Francisco Kalbuadi Lay, Atuál prezidente Federsaun Futebool Timor-Leste (FFTL), Francisco Jerónimo no Atual prezidente Liga Futebool Timor-Leste (LFTL), Nilton Telmo Gusmao Santos.
CharllY Junior
