DILI- Guarda rede Agostinha Nogueira sai eroi hodi lori ekipa AD. S.L.B. Laulara sai kampiaun tanba konsege salva penalidade husi jogadora adversariu iha jogu minutu 90 no suta penalidade.
Nia sente kontente tanba sai eroi hodi lori nia ekipa sai kampiaun Super Tasa Femenino ne’ebe nia esforsu konsege salva penalidade iha jogu husi jogadora S’Amuser FC nian.
“Hau sente kontente tebes no agradese tanba husi hau nia esforsu bele lori AD. S.L.B. Laulara sai kampiaun iha Super Tasa ida ne’e” Guarda rede AD. S.L.B. Laulara Agostinha Nogueira ba Jornalista JHD iha Stadium Munisipiu Dili, sabadu (29/01).
Nia hatutan, ba futuru atu mantein nafatin sai jogadora iha ekipa AD. S.L.B. Laulara sei haree maski gosta joga bola maibe presiza la’o ho buat seluk iha tinan oin mai.
Iha sorin seluk Kapitaun klube AD SLB Laulara Vanesa Fernandes hatete, nia sente orgullu tebes tanba ba dahuluk sai kampiaun iha torneiu dahuluk Super Tasa Femenino no hakarak oferese espesial kampiaun ida ne’e ba treinador matebian Filomeno Fernandes maske agora la hamutuk ona ho sira nia ekipa
“Hau sente orgullu tebes hala’o torneiu Super Tasa femenino ida ne’e ho esforsu ami sai kampiaun no loke dalan Super Tasa ida ne’e, Kampiaun ida ne’e ami hakarak ofererse premiu espesial ida ne’e ba ami nia treinador matebian Filomeno Fernandes maski agora nia la hamutuk ona ho ami iha ekipa AD. S.L.B. Laulara”. Nia hateten
Vanesa hatutan, Esperansa ba oin hakarak mantein pozisaun kampiaun ida ne’e no sei hadia diak liu tan ekipa nia jogu ohin ne’e no sei mantein sai joagador AD. S.L.B. maski klube balun hakarak kontratu.
Iha fatin hanesan Sekretariu Jeral Domingos Caeiro hateten, orgullu tebes no fo parabens ba jogadora sira nia esforsu sai kampiaun ba Super Tasa tanba sira rasik promete ba prezidente klube AD. S.L.B. Laulara Xanana Gusmão depois kampiaun iha Tasa Rosa Muki Bonaparte epoka 2021.
“Hau sente orgullu tebes no fo parabens ba jogadora sira nia esforsu sai kampiaun ba Super Tasa Femenino tanba tanba hau nia jogadora rasik promete ba prezidente klube AD. S.L.B. Laulara Xanana Gusmão depois kampiaun iha Tasa Rosa Muki Bonaparte epoka 2021” Nia hateten
Sekretariu jeral informa, tuir lolos iha ambisaun iha tinan kotuk atu foti liga Futebol femenino mai la konsege S’Amuser FC mak sai kampiaun iha liga refere, hein katak sai kampiaun dahuluk iha eventu ne’e kontinua motiva fali sira seluk hodi halo kompetisaun tinan oin sai kompetetivu liu no haree ona jogadora sira balun ne’ebe oras ne’e joga iha S’Amuser no Academica nian ne’ebe uluk joga iha klube AD. S.L.B. Laulara hodi lori fila fali mai ekipa ida ne’e no iha planu sei koalia ho federasaun atu halo ekipa feto rua.
S.L.B. Laulara sai kampiaun hetan orsamentu ho montante 2,500 USD (dollar Amerikanu rihun rua atus lima) ne’ebe manan nia adversariu S’Amuser FC liu husi suta penalidade ho skore 5-3 tanba sira empate iha jogu minutu 90.
ADS
