DILI- Prezidente Federasaun Futebol Timor-Leste (FFTL) periodu 2022-2026 Francisco Jeronimo sei dezenvolve futebol husi baze ho Kopa FFTL tanba kopa ne’e sei halo iha munisipiu ne’ebe laos partisipa tan ona ho klube sira iha Liga Timorense.
Tanba hakarak lori futebol iha Timor- Leste ba oin federasaun sei dezenvolve futebol husi baze ho Kopa FFTL ne’ebe mak sai hanesan komprimisiu Francisco Jeronimo nian iha nia mandatu periodu 2022-2026
“Ami sei dezenvolve futebol husi baze ne’ebe oras ne’e futebol komesa moris ona iha nivel munisipiu sira jogu sira ne’e juvenil, jogu feto nian no kopa balun komesa iha munisipiu sira ne’ebe agora ami hakarak reforsa fila fali tan atu nune’e bele diak liu nune’e sira mos prepara atu ba tuir Kopa FFTL ne’ebe sei halo iha munisipiu laos ona klube sira iha liga mak partisipa ne’ebe sai hanesan komprimisiu ami nian ne’ebe karik sei la halo iha tinan ne’e entaun ami halo iha tinan oin ne’e tama ona prioridade ne’ebe semana oin hau sei reuniaun ho ezekutivu sira saida deit mak halo iha tinan ne’e no tinan oin” Prezidente FFTL Francisco Jeronimo ba Jornalista sira iha fatin kongresu Lecidere, Dili sabadu (26/02).
Nia hatutan, sei halo saida mak nia koalia ona hodi kontinua saida mak halo tiha ona para mellora diak liu no hamosu sira ne’ebe mak seidauk iha ne’ebe infraestutura prioridade ba sira hanesan Stadium Munisipal Dili ne’ebe seidauk to’o iha faze final tanba sira hein hela governu atraveza SEJD bainhira mak sira hakarak atribui Stadium Munisipal Dili mai federasaun bele halo kontratu ida ho governu para nune’e federasaun bele tau matan ne’ebe nia prosesu la’o hela maibe kona ba kampu demokrasia nia prosesu hotu ona sira haruka ona ba FIFA no agora delegasaun ida husi FIFA iha ne’e hela aban sei koalia ho SEJD ba asuntu ne’e.
Francisco promete sei realiza futebol juvenil iha nivel munisipiu tenki la’o kada tinan iha munisipiu sira ne’ebe hanesan programa permanente, formasaun ba grassroots liu treinu jogador idade 8 to’o sanulu iha nivel munisipiu tenki la’o, formasaun ba arbitrajen ne’ebe mak halo ona iha nivel rejional no municipal sei kontinua no hadia diak liu tan tanba hakarak prepara arbitrazen tanba hakarak arbitrazen lidera jogu iha nivel internasional laos iha munisipal no nasional deit no realiza liga divizaun datoluk joga iha nivel rejional no sei bele mosu tan iha nivel munisipal
Jeronimo dehan, nia sei anunsiu nia estrutura kompletu iha semana oin tanba sei aprezenta ba nia membru ezekutivu sira hanesan vise-prezidente no membru ezekutivu sira inklui membru ezekutivu feto no nia sei kopera hamutuk nafatin ho orgaun LFTL para lori bola ba oin.
“Estrutura kompletu ami sei anunsiu iha semana oin tanba sei aprezenta ba hau nia ezekutivu sira no vise-prezidente no membru ezekutivu sira inklui membru ezekutivu feto ami sei koopera hamutuk nafatin ho orgaun LFTL hodi profisioniza futebol tanba ami iha paixasaun para atu lori bola ba oin” Nia dehan
ADS
