DILI-Federasaun Desportu Akademiku Timor-Leste (FDA-TL) aprezenta sira-nia natureza ba Confederação Desporto Timor-leste (CDTL) sigla portuges, ho nune’e parte rua bele apoiu malu iha futuru.
Federasaun Desportu Akadémiku Timor Leste hamrik ho natureza ida diferente ho federasaun desportiva sira seluk, tan ne’e parte Federasaun hasoru malun ho CDTL hodi koalia kona-ba natureza federasaun nian.
“Ohin ami aprezenta Ami nia natureza ba CDTL inklui planu sira ne’ebe mak federasaun iha para ba oin konfederasaun bele apoia federasaun” vise sekretariu jeral Juviano Chavez ba jornalista sira iha edifisiu Caicoli, Dili tersa (15/03).
Vise sekretariu jeral hatutan, CDTL ho FDA-TL ninia natureza la hanesan konfederasaun organiza desportu profisional iha Timor-Leste no FDA-TL organiza desportu Akademiku iha nivel universidade no institutu sira iha rai ne’e.
Iha enkontru refere, FDA-TL mos apresenta preparasaun Federasaun nian ne’ebé sei compete iha kompetisaun rejionál, Asian University Games (AUG) ne’ebé sei akontese iha tinan ne’e.
“Ba oin konfederasaun bele apoia federasaun, liuliu liga ho preparasaun ba kompetisaun rejional Asian University Games (AUG) ne’ebe mak sei realiza iha fulan Jullu to’o agostu tinan ne’e”
Enkuantu, parte CDTL kongratula no orgullu ba resultadu ne’ebé FDA-TL atinji. Ho nune’e, Prezidente CDTL hakarak asina memorandu ida, atu nune’e organizasaun desportiva refere bele hetan benefisiu mutual.
“Konfederasaun orgullu ba rezultadu mak federasaun iha, ne’ebe ba futuru konfederasaun hakarak asina memorandu ida ho FDA-TL atu nune’e organizasaun ne’e bele hetan benefisiu mutual hodi bele dezenvolve joven sira nia talentu iha nivel universidade no juvenil hodi partisipa eventu nasional no internasional” Prezidente CDTL hateten.
Prezidente hatutan “FDA-TL ne’ebe afilia ona ba konfederasaun tenki hatan ba lei baze desportivu no diploma ministerial publiku numeru 40/2020 ba utilidade publiku ne’ebe sira tenki estabelese ona asosiasaun sira iha nivel universitariu”.
Too ohin loron FDA-TL konsege estabele ona Asosiasaun hamutuk 16 husi ensinu superior 18 ne’ebé eziste iha Timor-Leste.
ADS
