DILI- Federasaun Taekwondo Timor-Leste ( FTTL) sei aumenta klase iha realizasaun Kampionatu Nasional (KN) nu’udár opurtunidade atu atleta lokal barak liu tan mak partisipa.
Modalidade desportiva Taekwondo, oras ne’e dau-daun buras tebes, dojan no klube moris no dezenvolve iha kada kantu sidade, hahu husi baze too nasionál. Tan ne’e, FTTL nafatin tau atividade Kampeonatu Nasionál nu’udár eventu anual, hanesan meius atu bele fo espasu ba atleta sira hatudu talent nomós atu hetan fini atleta ba future nian.
“FTTL ninia Planu ba atividade 2022 inklui realiza Kampionatu nasional, ami submete ona ba CDTL depois sei lori ba SEJD atu realiza kampionatu nasional iha tinan 2022”, prezidente FTTL Gabriel da Costa ba jornalista JHD iha Jinaziu desportu Caicoli, Díli kuarta (16/03)
Prezidente hatutan, tinan Ida ne’e sira nia pedidu submete ona ba CDTL depois sei ba SEJD para atu halo aprovasaun hein katak sei realiza eventu nasional ne’e importante tebes atu bele hetan fini foun.
Ho dezenvolvimentu taekwondo ne’ebé buras tebes maka Federasaun nia planu sei tan klase, nune’e sei aumenta atleta husi kada dojan.
“Orsamentu ne’ebe mak Ami tau iha pedidu ba kampionatu nasional ho montante 55,000 USD. tanba agora ita hakarak klase iha eventu nasional ne’e tenki loke tan hodi aumenta atleta husi dojan sira, tanba iha tinan kotuk dojan ida mai ho atleta feto no mane haat, tanba iha orsamentu ne’ebe ho montante kiik, ne’ebe tinan ida ne’e, orsamentu aumenta tuir pedidu, ita aumenta atleta feto no mane nain neen kada dojan sira mai partisipa kampionatu nasional iha tinan ne’e hodi nune’e halo Eventu boot liu tan” tenik Nia
Nia hakotu, partisapasaun ba eventu nasional normalmente mai husi dojan sira iha munisipiu Díli no inklui iha munisipiu sira hotu tanba kada tinan dojan sira husi munisipiu sempre partisipa hodi reprezenta sira nia asosiasaun ida-idak no tuir Planu federasaun, kampionatu ne’e sei realiza depois Sea Games iha Vietnam fulan maiu.
Kampionatu sei partisipa husi klube no dojan sira mai husi munisipiu 12 no RAEOA mak Lautem, Baucau, Viqueque, Manatuto, Díli, Aileu, Ainaro, Manufahi, Covalima Ermera, Bobonaro, Liquiça.
ADS
