DILI- Sekretariu Estadu Juventude Desportu (SEJD) liu husi diresaun alta kompetisaun sei apoiu federasaun desportiva iha Timor Leste ho montante orsamentu 1,127,010.50 USD hodi finansia programaba tolu : reforsa kapasidade instituisional, realiza eventu nasional no partisipasaun ba eventu internasional sira iha tinan 2022.
Kada tinan Governu liu husi SEJD sempre apoiu kualker atividade ne’ebé haklean no dezenvolve desportu iha Timor Leste, ba tinan ida ne’e SEJD prepara osan ho montante 1,127,010.50 USD.
“Orsamentu ne’ebe ami sei apoiu ba federasaun sira iha tinan ida ne’e ba programa tolu mak reforsa kapasidade instituisional ninia orsamentu ho montante 480, 740 USD, ba realizasaun eventu nasional federasaun sira nian ho montante 494,270.50 USD no partisipasaun ba eventu internasional iha orsamentu 152,000 USD ne’ebe nia total orsamentu ho montante 1,127,010.50 USD” Xefe departamentu kompetisaun no selesaun nasional Vasco Ribeiro ba jornalista JHD iha nia knaar fatin Lecidere, Díli kuarta (16/03)
Xefe hatutan, husi programa tolu ne’e, ba reforsa kapasidade instituisional ne’e apoiu ba CDTL, CONTL no Sentru juvenil futebol Timor-Leste, programa realiza eventu nasional sei apoiu ba federasaun sira inklui liga futebol no voleibol nian no ikus apoiu partisipasaun ba eventu internasional ne’e mak preparasaun ba Sea Games iha Vietnam, Sea Paragames iha solo, Indonesia, Asian Games no Asian Paragames iha China.
Vasco informa, proposta provizoriu mak SEJD liu husi diresaun alta kompetisaun mak proposta husi sentru juvenil ba reforsa kapasidade instituisional nian no partisipasaun ba Sea Games nian.
“Proposta ne’ebe ami simu provizoriu mak husi sentru juvenil ba reforsa kapasidade sentru nian no partisipasaun ba Sea Games iha Vietnam ida ne’e ami simu ona ne’ebe agora iha hela prosesu verifikasaun ba proposta sira ne’e iha diresaun alta kompetisaun né’ebe hotu mak Ami sei lori ba sekretariu estadu ba iha tinan 2020 nian” tenik Nia
Nia hakotu, tuir politika SEJD nian ba federasaun haat mak sai hanesan prioridade ba iha desenvolvimentu desportu mak federasaun futebol, Taekwondo, Boxing no atletizmu ba programa tolu ne’e maibe SEJD la taka dalan ba federasaun sira seluk ba programa tolu refere tanba diresaun alta kompetisaun hatutan deit politiku governu nian no gora iha hela faze ida depois halo levantamentu dadus organizasaun desportu sira hotu ne’ebe relatoriu final iha ona diretor jeral no sei halo preparasaun ba kriteria sira tuir diploma ministerial publiku numeru 40/2020.
ADS
