Dili – Kapitaun ekipa selesaun nasionál Futsal Timor Leste, Jose Mata Lopes, ho fiar aan sei sira sei hatudu jogu di’ak iha AFF Futsal Championsip, maske Timor Leste iha pool Infernu tanba hamutuk ho Austrália Vietnam no Myanmar.
Kapitaun ekipa selesaun nasionál Futsal José Mata Lopes hatete, Maski sei kompete ho nasaun sira ne’ebe nia dezenvolvimentu futsal as tebes iha AFF Futsal Championship 2022 iha Tailandia maibé selesaun nasional sei hatudu rezultadu di’ak iha kompetisaun ne’e.
“Ita hotu hatene katak Timor-Leste pool B hamutuk ho nasaun Australia, Vietnam no Myanmar ne’ebe mak iha dezenvolvimentu futsal ne’ebe as tebes maibé ami sei la lakon esperansa atu kompete ho sira tamba ami mos iha preparasaun atu hetan rezultadu di’ak iha AFF Futsal Championship 2022 iha Tailandia” Kapitaun Jose Mata Lopes ba jornalista JHD liu via WhatsAap Sabadu (02/04).
Kapitaun hatutan, Jogador hotu iha ona preparasaun ne’ebe maximu ona atu kompete iha AFF futsal championship ne’ebé mak sei realiza iha Tailandia ne’ebé durante fulan tolu nia laran halo treinamentu.
Iha sorin seluk treinador selesaun nasional futsal Timor-Leste Jorge Fernandes dehan, nia halo preparasaun di’ak ba jogador sira ne’ebe sei hasoru nasaun boot sira maibé nia esperansa boot jogador sira hatudu jogu di’ak tanba iha kualidade.
“Ita nia preparasaun durante ne’e nia uza tempu ho maximu hodi fo treinu jogador sira, maski pool hamutuk ho nasaun boot sira maibe ami prontu hatudu esforsu masimu no iha esperansa boot hatudu rezultadu diak tanba jogador sira iha kualidade atu halo jogu ne’ebe diak” Jorge informa
AFF Futsal Championship iha Tailandia sei komesa iha loron 2 remata iha loron 10 fulan abril tinan ne’e Timor-Leste fasil sei joga kontra Austrália iha loron 4 fulan abril, kontra Vietnam iha loron 5 fulan abril no kontra Myanmar iha loron 6 abril 2022.
ADS
