DILI— Federasaun Taekwondo Timor-Leste (FTTL), hetan apoiu finanseiru husi embaixadór korea súl iha Timor-Leste hodi realiza kompetisaun nasional embaixador Cup 2022, atu mellora atleta sira hodi hatudu talentu no prestasaun di’ak atu kompete iha jogu internasional.
“Iha momentu ida ne’e ita asiste atleta sira husi FTTL sei hatudu talentu liuhusi eventu ida ne’ebé mak hanaran kompetisaun nasional Embaixadór Cup 2022”, hatete prezidente FTTL Gabriel da Costa ba jornalista sira iha fatin training center (TC) tibar, Dili sabadu (02/04).
Prezidente ne’e mós agrades ba embaixadór Korea súl iha TL ne’ebé apoiu modalidade taekwondo hanesan fundamentu ida atu promove no kualifika taekwondo di’ak liu iha TL.
Nia dehan, eventu ida ne’e hanesan atu rezulta atleta sira hodi dixiplina no karakter sai defensor ba lia los ba justisa, liuhusi espíritu desportivu no mós reprezenta nasaun Timor hodi partisipa iha eventu internasional sira.
Gabreil hatete, lori federasaun nia naran agrades ba governu Timor-leste liuhusi sekretariu estadu juventude no desportu (SEJD), ne’ebé sai mahon ba FTTL hodi asegura meius oin-oin no dezenvolve modalidade taekwondo.
Nia hatutan, durante ne’e federasaun sente la la’o mesak, karik la’o mesak sei la atinje mehi federasaun nian, bainhira lahetan apoiu husi governu.
“Nune’e mós husu nafatin ba governu labele husi federasaun sira la’o mesak, maibé ita la’o hamutuk hodi hateke Timor ida di’ak liu ho esperansa desportivu hodi garante dezenvolvimentu nasaun Timor-leste iha area desportu”, katak Gabriel.
Iha fatin hanesan embaixadór korea súl iha Timor-Leste, Kim Joeng Ho, agrades ba atleta sira tanba ohin partisipa hotu iha kompetisaun nasionál embaixadór Cup hodi hatudu sira nia talentu.
“Hanesaun nasaun ne’ebé mak sai na’in ba taekwondo agradese ba governu Timor-leste, tanba iha interese makaas atu dezenvolve taekwondo iha TL”, hatete embaixador korea Kim Joeng Ho.
Nia haktuir, modalidade taekeondo la’ós hanesan arte marsiais seluk hodi ataka malu iha fatin públiku, maibé atu protese no kuidadu hodi bele halo tuir espíritu no dixipplina atu dezenvolve sira nia mentalidade iha area desportivu nian.
Atleta ne’ebé atu partisipa iha sea games manan la’ós ba individu maibé ne’e hatudu nasaun Timor-leste ba iha mundu internasionál liuhusi area desportu nian.
Nune’e sekretariu jeral FTTL, Alexanrino Samurai, informa, kompetisaun embaixadór Cup hahú iha 2015 to’o agora, programa ne’e mai husi inisiativu embaixadór korea súl.
Sekretariu jeral ne’e afirma, kompetisaun ne’e hetan apoiu masimu husi embaixadór Korea súl, ho montante dollar amerikanu 7,300 USD hodi fasilita atleta husi dojang sira hodi tuir eventu refere.
Entretantu partisipante iha kompetisaun emabaixador Cup 2022 ne’e mak, Sekrtariu estadu juventude no desportu (SEJD), Abrão Saldanha, Prezidente Confederasaun Desportu Timor-Leste (CDTL), Mácario F. Sanches, Vise- prezidente komité olimpiku nasional Timor-Leste (CONTL), Mateus da Cruz, Prezidente Federasaun Taekwondo Timor-Leste (FTTL), Gabriel da Costa, Embaixadór korea súl, Kim Joeng Ho, dojang hamutuk 26 husi Munisípiu 6 mak hanesan Lautém, Baucau, Bobonaru, Liquica, Ermera, no Dili
ADS
