DILI-Confederação Desporto Timor-leste (CDTL sigla portuges) halo ona avaliasaun ba dokumentu federasaun desportivu hamutuk 37 durante fulan rua nia laran bazeia rekezitu utilidade publiku desportivu tuir diploma ministerial nian atu nune’e federasaun sira ne’e bele hala’o atividade idak-idak nian.
Federasaun sira hatama ona dokumentu tuir rekezitu diploma ministerial ba utilidade publiku desportivu tan ne’e CDTL halo ona avaliasaun ba sira nia dokumentu sira ne’e kompletu tuir ona rekezitu diploma ministerial karik seiduk kompletu husu para federasaun sira halo kompletu.
“Ami halo ona avaliasaun ba federasaun 37 ne’ebe oras ne’e hamahan an iha konfederasaun ne’ebé ho hanoin ida para federasaun sira halo kompletu dokumentu bazeia ba utilidade publiku desportivu tuir diploma ministerial hodi sai hanesan rekezitu ba sira kontinua eziste no ezerse atividade iha organizasaun ne’ebe ohin ami bolu federasaun sira ba relata rezultadu avaliasaun durante fulan rua nia laran“, Xefe departamentu dezenvolvimentu federasaun desportivu Elias de Deus ba jornalista sira iha nia knaar fatin Caicoli, Dili sesta (22/04).
Nia dehan, alende relata availasaun ba federasaun sira rona mós federasaun sira nia prekupasaun sira ba notifiksaun ne’ebé konfederasaun fó ba sira ba rekezitu utilidade publiku nian ne’ebé atu nune’e konfederasaun hatutan rekomendasaun ba parseria sira hanesan governu liu SEJD tanba problema ne’ebe sira hasoru laos deit problema federasaun nian maibe problema relasiona parseria ho governu atu nune’e federasaun kontinua la’o nafatin.
Elias informa, avalisaun né’ebe federasaun sira halo ona tuir kategoria haat mak dokumentu kompletu, dokumentu kuaje kompletu, dokumentu inkompletu no dokumentu kuaje la iha ne’e servisu ida ne’e durante ne’e CDTL halo hodi reforsa federasaun sira nia atividade maibé sira tenki ruir ezizensia diploma ministerial ne’ebe obriga federasaun sira halo ida ne’e.
Nia dehan, sira halo ona avaliasaun ba federasaun sira ne’ebe tama ba kategoria dokumentu kompletu hamutuk haat mak Atletismu, Xadres, Karate-Do no Futebol, kategoria dokumentu kuaze kompletu hamutuk sia, dokumentu inkompletu hamutuk federasaun ualu no kategoria dokumentu kuaze la ha hamutuk 14 ida ne’e mak avaliasaun CDTL halo durante fulan rua nia laran no ohin bolu federasaun sira para relata ba sira.
Elias hakotu, sira ne’ebe dokumentu seidauk kompletu CDTL ezize nafatin ba sira buka esforsu atu kompleta tanba ne’e rekezitu tuir diploma ministerial nian maski ohin CDTL fo ona rezultadu avaliasaun maibe sei fo nafatin Tempu ba federasaun sira mai halo kompletu dokumentu sira.
Iha fatin hanesan sekretariu jeral Federasaun Voleibol Timor-Leste (FVTL) Candido da S. Pinto hatete, ohin sira hasoru malu ho CDTL ne’ebe sira prontu halo tuir programa ne’ebe CDTL hato’o ba sira ba avalisaun no formasaun maski federasaun voleibol nia parte nia dokumentu seidauk kompletu maibe sira sei tur hamutuk fali hodi halo dokumentu kompletu hatama mai CDTL.
“Ohin ami hasoru malu ho CDTL ne’ebe ami prontu halo tuir programa ne’ebe CDTL hato’o ba ami ba avalisaun dokumentu no formasaun maski ami nia parte dokumentu seidauk kompletu maibe ami sei tur hamutuk fali hodi halo dokumentu kompletu hatama mai CDTL“, tenik Nia.
Enkuantu Federasaun sira ne’ebe hamahan an iha CDTL mak Atletismu, Taekwondo, Futebol, Karate-Do, Voleibol, Boxing, Basketebol, Tiru, Teqball, Aikido, Kempo, kung-Fu Wushu, Tenis Kampu, Motosiklismu, Siklismu, Fhacuptil, Netball, Sailing, Kricket, Judo, Hockey, Biliard, Muathay, Tenis Meza, Andebol, Silat no Pentatlon.
ADS
