DILI – Ekipa Juvenil Boa Sorte Fc susesu sai juara grupu (D) Tasa Asosiasaun Futsal Timor-Leste (AFTL), hafaoin manán nia ekipa adversariu Relay Laleia Fc ho score dramatiku 5-4.
Duelo entre ekipa juvenil sub-14 rua ne’e hala’o jogu iha kampu Futsal BJ Habibie Dili kuarta, (11/05).
Iha inisiu jogu ekipa rua ne’e hotu hotu iha ambisaun hodi marka golu, liu husi kontra no atu ba malu maibé ekipa Relay Laleia Fc, ne’ebé mak hatudu ritmu jogu konsege domina bola hodi marka golu rua tuir tuir malu, liu husi jogador, Francisco Soares, iha minutu 3, no Salvador da Costa, iha minutu 6 ho núne’e hatuur kedas score ba 2-0.
Ekipa Boa Sorte Fc ne’ebé sofre uluk rua halo kedas mudansa ba jogu liu husi tatika husi ain ba ain ho núne’e Boa Sorte Fc, susesu responde hikas rua tuir tuir malu, liu husi jogador Nivaldo iha minutu 11 no Lidencio Nunes, iha minutu 13, ho núne’e score muda aan ba 2-2.
Ho score ne’e jogu sai manás liu tan, maibé sorti di’ak monu ba ekipa Relay Laleia Fc, hodi marka tan golu ida liu husi jogador Francisco Soares, hodi hatuur score ba 3-2 to’o termina jogu Primeira parte.
Kontinua ba jogu segunda parte ekipa rua ne’e mantein lansa kontra ataka ba malu, ho nune’e tama ba iha minutu 21, Relay Laleia haboot liu tan score ba 4 – 2, hafoin jogador Nivaldo halo auto golu.
Hela ho score 4-2, la hamate espiritu kompetetivu jogador juvenil sub-14 Boa Sorte Fc, hodi halo kontra atake ba Relay Laleia Fc, ho nune’e ekipa Boa Sorte marka tan golu rua tuir malu liu husi jogador Octavio iha minutu 22 no 24. Ho nune’e score muda aan ba 4-4.
Ho golu ne’e jogu sai manás liu tan liu husi kontra no ataka ho nune’e tama ba iha minutu 28 Boa Sorte Fc , marka tan golu ida hanesan golu determinante hodi muda score ba 5-4 liu husi jogador Charles ho núne’e to’o termina jogu segunda parte vitória ba Boa Sorte Fc.
Rezultadu vitória ne’e hatuur kedas ekipa Boa Sorte Fc iha pozisaun dahuluk ho pontus 4, husi joga dala 2.
Enkuantu ekipa Relay Laleia Fc, maske derrota maibé nafatin hakat ba 8 finais hanesan runner-up ho pontus 3 husi joga dala 2.
DVO
