DILI – Ekipa Juvenil sub-14, Crazy Horse, susesu hakat ba 8 finais, Tasa Futsal AFTL Sub-14, hafoin empata ho nia ekipa adversariu Becusse United ho score 3-3 iha jogu ikus faze grupu (D).
Hala’o jogu iha kampu Futsal BJ Habibie Dili, tersa, (10/05), iha inisiu jogu ekipa rua ne’e hotu hotu hatudu jogu furak iha kampu hodi atrai adeptus hadomi Futsal ne’ebé asiste jogu refere.
Maibé iha insiu jogu ekipa Becusse United ne’ebé mak hatudu ritmu jogu konsege domina bola hodi lansa suta fila fila Crazy Horse, konsge rezulta golu ida iha minutu 5, liu husi jogador, Geovanio Kevi, hodi muda score ba 1-0.
Ho golu ne’e ekipa rua mantein lansa kontra no ataka ba malu maibé la iha golu ruma mak akontese to’o termina jogu primeira parte score mantein 1-0.
Kontinua ba jogu segunda parte ekipa Crazy ne’ebé mak sofre uluk golu ida iha primeira parte, hahú kedas ho tensi jogu ne’ebé aas ho nune’e tama ba iha minutu 20 Zenildo Menezes, konsge responde golu ida hodi halo balansu score ba 1-1.
Ho golu ne’e hafanu vontade ekipa Crazy Horse, ho núne’e tama ba iha minutu 22, Crazy Horse marka aumenta tan golu ida liu husi jogador, Paulo Lay, hodi hatuur score ba 2-1.
Hela ho score 2-1, la hamate espiritu juvenil Becusse United, halo sira hatudu nafatin jogu bonitu ho núne’e jogador Febriano, marka golu rua tui-tuir malu hodi hatuur kedas score ba 3-2.
Ho score 3-2 ne’e halo ekipa Crazy Horse halo mudansa ba tátika hodi hasai guarda rede hodi hatama hikas jogador ho nune’e tama ba minutu 29 Molok atu termina jogu ekipa Crazy Horse konsge marka tan golu ida hodi halo empata score ba 3-3, ho score ne’e mantein to’o termina jogu segunda parte.
Husi rezultadu empata ne’e lori ekipa Crazy Horse hakat ba 8 finais Tasa Futsal AFTL Sub-14 pool (D) ho pontus 4.
Enkuantu ekipa Becusse United Fc, okupa iha segunda klasifikasaun ho pontus 1 husi joga dala ida no Becusse sei iha jogu dala ida kontra B’tal.
DVO
