Dili – Ekipa Juvenil sub-14, Fitun Estudante susesu hakat ba Semi Final Tasa AFTL Futsal Sub-14, hafaoin hurlele nia ekipa adversariu Relay Laleia Fc, ho score 3-1, iha Quatro Finais.
Jogu ne’ebé mak hala’o iha kampu Futsal BJ Habibie, Dili, sabadu, (14/05). Ekipa rua tun kedas ho ambisaun aas hodi marka golu iha jogu refere.
Maibé sorti di’ak monu liu ba ekipa Fitun Estudante, hodi lídera uluk ho score 1-0, hafoin, António Alves susesu fura rede Relay Laleia Fc.
Ho golu ne’e halo jogu kontinua manas liu tan ho núne’e tama ba iha minutu 12 ekipa Fitun Estudante, marka tan golu ida hodi muda aumenta score ba 2-0, liu husi jogador, Mário Soares.
La Para de’it ho ida ne’e liu de’it minutu ida Fitun Estudante, haboot liu tan score ba 3-0 nafatin liu husi jogador Mário Soares, ho score refere mantein to’o termina jogu primeira parte.
Kontinua ba jogu segunda parte ekipa rua mantein lansa kontra ataka ba malu maibé ekipa, Relay Laleia Fc ne’ebé sofre ona golu tolu konsege halo mudansa ba tátika hodi halo presaun ba Fitun Estudante, ho núne’e tama ba iha minutu 27 Relay Laleia konsge produs golu ida hodi hamihis score ba 3-1 liu husi jogador, Cesarino.
Ho golu ne’e halo intensidade jogu Komesa manás liu tan maibé la iha tan golu ruma mak akontese to’o termina jogu segunda parte vitória Fitun Estudante ho score 3-1.
Enteretantu, Jogu ne’ebé mak hala’o de’it ho tempu minutu 30 ne’e la hamate espiritu kompetetivu jogador juvenil sub-14 sira hodi hatudu sira nia skiil no talentu ne’ebé mak sira iha.
Husi rezultadu vitória ne’e lori ekipa Fitun Estudante hakat ba Semi Final Tasa AFTL Futsal Sub-14.
Enkuantu ekipa Relay Laleia Fc, tenke elimina husi Tasa AFTL Futsal Sub-14 tanba jogu oitavu fianis ne’e sistema bota fora ka Lakon sai.
DVO
