Dili – Ekipa Juvenil sub-14 Boa Sorte Fc, susesu hakat ba Final hafaoin halakon nia ekipa adversariu Fitun Estudante ho score 4-3, meus finais Tasa Futsal AFTL Sub-14, liu husi Golu Jefriano Saldanha iha minutu ikus
Jogu entre ekipa ne’e hala’o iha kampu Futsal BJ Habibie Dili kuarta (18/05), ekipa rua ne’e hahú jogu ho ritmu tuir tekniku no tatiku ida-idak nian maibé ekipa Boa Sorte ne’ebé mak domina liu bola konsege produs uluk golu ida liu husi jogador Leonel iha minutu 3 hodi hatuur rezultadu ba 1-0.
Ho golu ne’e halo ekipa rua mantein lansa kontra no ataka ba malu ho núne’e tama ba iha minutu 11 Sorte di’ak monu ba ekipa Boa Sorte hodi haboot score ba 2-0, liu husi asaun Charles.
Sofre uluk golu rua la hamate espiritu kompetetivu jogador Fiel hodi halo kontra atake ba nia ekipa adversariu ho núne’e tama ba iha minutu 14 ekipa Fiel konsge responde golu ida hodi hamihis score ba 2-1 to’o termina jogu primeira parte.
Kontinua ba jogu segunda parte ekipa rua ne’e mantein lansa kontra no ataka ba malu maibé ekipa Fiel ne’ebé mak halo mudansa ba tátika konsge hatudu rezultadu pozetivu ikus mai konsge produs golu ida hodi halo empata score ba 2-2 iha minutu 20, liu husi jogador Jerri Melky.
Liu de’it minutu 2 Fiel aumenta tan golu ida hodi lídera hikas ho score 3-2 liu husi jogador Mário Viera.
Tama ba iha minutu 25 ekipa Boa Sorte konsge responde hikas golu ida hodi hatuur score ba 3-3 liu husi jogador Charles.
Golu Vitoria husi ekipa Boa Sorte Fc, foin produs iha minutu 29 liu husi jogador Jefriano Saldanha hodi hatuur score ba 4-3 ho score ne’e hakotu destinu ekipa Fiel.
Husi rezultadu vitória ne’e lori ekipa Boa Sorte Fc hakat ba Final Tasa Futsal AFTL Sub-14.
DVO
