DILI – Kompania Telekomunikasaun Telemor oferese premiu apresiasiasaun 1.500.00 USD ba atleta nain 4 husi modalidade atletizmu, boxing no Taekwondo ne’ebe mak oferese medalla osan mutin 3 no osan metan 2 no hamorin ona Timor Leste nia naran iha Sea Games 2022 iha Vietnam.
“Ami kompania Telemor apresia ba rezultadu ne’ebe atleta Timor-Leste hetan iha Sea Games Vietnam, tanba molok kontijente Timor-Leste hakat ba Vietnam Ami halo ona akordu ho CDTL atu fo apoiu ba atleta sira no mos fo premiu ba sira ne’ebe hetan medalla” haktuir reprezenta kompania Telemor Elias Amaral ba jornalista sira iha sala VIP Airoportu Internasional Nicolau Lobato Comoro, Kuarta (25/05).
“Ohin ami husi Telemor mai entrega plaka premiu orsamentu simbolika ba manan nain medalla sira ne’ebe manan nain medalla dahuluk hetan orsamentu ho montante 500 USD husi Telemor ba atleta sira seluk tuir ne’e ami fo premiu orsamentu montante 250 USD ne’ebé hanesan apresisaun ba atleta sira ba rai doben Timor-Leste nian” tenik Elias.
Nia dehan, orsamentu sira sei entrega ba atleta manan nain medaila sira iha loron 27 fulan maiu 2022.
Iha sorin seluk prezidente CDTL Macario F Sanches, apresia ba Kompanha telemor ne’ebé maka ba dahuluk investor ne’ebé mak hakarak apresia atleta sira no sei hein bainhira governu halo ajenda han hamutuk ho atleta sira mak sei entrega premiu ofisial ba atleta manan nain medaila sira husi governu no telemor rasik.
Macario hatutan, alende hetan premiu orsamentu husi kompania Telemor atleta manan nain medalla sira mos hetan pakote internet ilimitadu ne’ebe atleta hetan medalla osan mutin sei hetan pakote ilimitadu durante fulan rua no medalla osan metan hetan pakote durante fulan ida nia laran ne’e Telemor sira sei hahu bainhira entrega ofisial premiu ba sira.
Premiu apresisaun ne’ebe Telemor oferese ba atleta sira mak atleta Felisberto de Deus husi modalidade atletizmu hetan 750 USD tanba hetan medalla dahuluk no oferese medalla osan mutin rua.
Atleta husi modalidade boxing Délio A. Mouzinho no José Barreto Quintas kada ida-idak hetan 250 USD no uniku atleta feto husi modalidade Taekwondo Santina A. de Sousa hetan 250 USD ne’ebe total orsamentu kompania Telemor fo atleta sira hamutuk 1,500 USD.
ADS
