DILI – Tinan ne’e Federsaun Boxing Amadora Timor-Leste (FBATL), oferese medaila rua ba Timor-Leste, liu husi Atleta Delio A. Mouzinho no José Barreto Quintas iha Jogu Sudeste Aziatiku (Sea Games) ba dala XXXI, iha Hanoi, Vietnam.
Sea Games ba dala XXXI ne’ebé mak hala’o iha sidade Hanoi, Vietnam, 2022 ne’e Timor Leste partispa ho Modalidade 7 mak hanesan Atletismu Karate-do Halterofelismu Taikondow Natasaun no Boxe.
Atleta Boxe Timor Leste Delio Anzaqeci Mouzinho konsge marka istória foun ida ba Timor Leste iha jogu refere hafoin halakon nia atleta Malaysia no Cambodia to’o tama ba faze Final hafoin derota ho nia adversáriu Eumir Marcial husi nasaun Filipina.
“Hau sente kontente no agradese ba povu Timor-Leste inklui eroi, governu no familia sira ne’ebé durante suporta nafatin ha’u ba kompete iha Sea Games 2022 iha Vietnam tan ne’e Ha’u bele kompete ho di’ak no lori medalla Osan mutin mai Timor-Leste“, dehan Délio ba jornalista iha Ginaziu Desportu Díli Caicoli, Díli kuarta (25/05).
Boxista El Matador ne’e husu, governu tenki tau matan ba atleta desportivu sira hotu liu-liu atleta boxista sira tanba sira ne’e iha nia talentu idak-idak nian atu nune’e sira bele promove atleta sira nia talentu iha área desportu hotu-hotu.
Núne’e mós atleta nasional boxing José Barreto Quintas hatete, nia parte sente orgullu tanba bele oferese tan medaila ba osan metan tan ba Timor-Leste no ba oin nia hanesan atleta sei esforsu nafatin hodi hetan rezultadu diak liu.
“Hau orgullu tebes tanba dala ida tan iha tinan ida ne’e hau oferese medalla osan metan tan ba nasaun Timor-Leste no ba oin hau hanesan atleta sei esforsu nafatin hodi hetan rezultadu diak liu ida ne’e mai rai doben Timor-Leste” José dehan.
Entretantu treinador boxing Gil Isac dos Santos, hatete, tinan ne’e atleta sira nia prepasaun diak hodi hetan medalla osan mutin no metan maibe sei hadia tekniku ba atleta sira tanba ne’e husu ba governu tenki serbisu hamutuk ho Federsaun atu hadia di’ak liu tan
“Hau sente kontente tanba atleta sira nia prepasaun diak hodi hetan medalla osan mutin no metan maibe ita tenki hadia tekniku ba atleta sira iha jogu ne’ebe federasaun ho governu tenki serbisu hamutuk haree ita nia atleta sira tanba federasaun boxing deit labele“, Gil hateten
Enkuantu Federsaun Boxe rasik tinan ne’e partispa iha jogu Sudeste Áziatiku ho atleta na’in 3 mak hanesan Delio Anzaqeci Mouzinho, José Barreto Quintas no Raimundo Gama.
ADS
