DILI– Governu liu husi Sekretariu Estadu Juventude Desportu (SEJD) atraveza husi komisaun nasional desportu atribui ona premiu ba atletas Timoroan na’in 4 ne’ebé hatudu ona prestasaun di’ak hodi oferese ona medaila 5 mai Timor Leste iha jogu sudeste Aziatiku (Sea Games) ba dala XXXI iha Hanoi Vietnam.
Tinan ne’e Timor-Leste hatudu ona prestasaun di’ak iha jogu Sea Games, no fila ho Medaila osan 5 kompostu husi osan mutin 3 no osan metan 2 husi Modalidade hamutuk 3 mak oferese.
Medaila hirak ne’ebé mak Timor Leste hetan ne’e mai husi Atleta lutador sira hanesan, Felisberto de Deus, Delio Anzaqeci Mouzinho, José Barreto Quintas no Santina Adelaide.
Tanba ne’e governu liu husi Sekretariu Estadu Joventude no Desportu oferese premiu apresiasaun ba atleta prestasaun sira, nu’udar mós meus hodi valoriza atleta sira nia kontribuisaun. Tanba ne’e governu oferese premiu ba atleta sira ho tipu rua mak hanesan premiu eselensia no premiu esensional ba bolsu desportivu.
“Ami deside ona hodi atribui premiu ba atleta sira ne’ebé hetan medalla osan mutin tolu no metan rua husi modalidade atletizmu boxing no Taekwondo iha jogu sudeste Aziatiku (Sea Games) tinan 2022 ne’ebé komisaun nasional desportivu deside atribui premiu ba atleta sira ho prestasaun ne’ebé Estadu rekonese tuir baze legal depois tetu di’ak ho numeru partisipasaun no prestasaun iha jogu tan ne’e ami atribui premiu iha tipu rua premium eselensia no premiu esensional ba bolsu desportivu ne’ebe tinan ida ne’e governu atribui premiu rua la hanesan tinan uluk nian tanba tinan uluk fo premiu eselensia deit” haktuir, SEJD Abrão Saldanha liu husi nia diskursu iha restorante Becari Metiaut, Díli sesta (27/05).
Abrao Salienta, premiu sira ne’e mak komisaun nasional desportu deside atribui ba atleta prestasaun ne’ebe tinan ida ne’e governu aumenta premiu ida esensional ba bolsu desportivu tanba atu ajuda selu atleta sira nia eskola no sosa fasilidade treinu nian hodi rekonese atleta sira no mos bainhira atleta sira mak hetan prestasaun nia federasaun mós tenki hetan utilidade publiku nian tanba iha desportu kompete mak hetan premiu.
Iha premiu ne’e atleta Felisberto de Deus ne’ebé mak oferese medaila osan mutin 2, iha direitu hodi hetan osan ho montante 15.000.00 dólar Amerikanu. Husi montante 15.000.00 dólar ne’e fahe ba parte rua mak premiu eselensia ho montante 10.000 dólar no premiu enensional ho mantante 5.000.00 dólar Amerikanu.
Aleinde Felisberto atleta boxista Delio Anzaqeci Mouzinho mós oferese medaila osan mutin 1 hafoin halakon nia adversáriu 2 mak hafoin derota iha final tanba ne’e atleta ne’ebé mak joga iha klase 69-75 kg ne’e, mós iha direitu hodi hetan premiu husi komisaun nasional desportu 5.000 dólar ba premiu esensional no ba bolsu desportivu 2.500.00 dólar tanba ne’e total premiu ne’ebé mak atleta Delio hetan husi komisaun desportivu hamautuk dólar 7,500.
Núne’e mós atleta boxista Jose Barreto Quintas ne’ebé mak husi klase 52-57 kg oferese medaila osan metan iha direitu atu hetan premium ba eselensia 3.000.00 dólar no premiu esensional ba bolsu desportivu 1.500.00 dólar ho núne’e total premiu ne’ebé mak atleta ne’e hetan hamutuk 4.500.00 dólar no ikus liu atleta Santina A. de Sousa husi Modalidade Taikondow under 53 kg ne’ebé mak oferese medalla osan metan mós iha direitu hodi hetan premiu eselensia 3000 USD no premiu esensional ba bolsu desportivu 1500 total premiu 4500 USD.
Alende premiu ba atleta prestasaun sira iha komisaun desportivu mós fahe premiu ba ekipa tekniku husi modalidade sira hanesan atletizmu hetan 5000 USD tanba atleta Felisberto de Deus hetan medalla osan mutin rua, ekipa tekniku husi modalidade boxing hetan premiu 2500 husi atleta Delio A. Mouzinho ne’ebe hetan medalla osan mutin no hetan premiu 1500 husi atleta Jose Barreto Quintas hetan medalla osan metan no ikus ba ekipa tekniku husi modalidade Taekwondo hetan 1500 tanba atleta Santina A. de Sousa hetan medalla osan metan.
Enteretantu, Partisipa seremonia fahe premiu ne’e mak Sekretariu Estadu Juventude no Desportu Abrao Saldanha, vise Ministru Edukasaun Joventude no Desportu (MEJD), António Guterres, Sekretariu Estadu komunikasaun sosiál (SECOMS), Prezidente Konfederasaun Desportu Timor-Leste (CDTL) Macario Sanches, no mós Prezidente Federsaun sira.
ADS
