DILI– Prezidente Internu klubu Estrela Baguia, Helio Francisco Amaral, sente orgullu tanba sira nia klubu bele hetan konvite hodi harame Taça FALINTIL Futsal 2022.
Komemorasaun loron Forsas Armadas ba Libertasaun Nasional Timor-Leste (FALINTIL), ba dala 47. F-FDTL realiza torneiu Futsal ho naran “TAÇA FALINTIL Futsal 2022”, no organiza hosi Média Online Joventude Hadomi Desportu (JHD)
Atu espresa respeitu kle’an no gratidaun ba FALINTIL no fó ónra ba Kombatente Libertasaun Nasionál nian sira ne’ebé, ho aten-barani no sakrifísiu, durante luta iha tinan 24 nia laran, lori Timor-Leste sai livre no independente.
Tanba ne’e mak eventu refere nakloke ba ekipa oioin, hodi partispa iha Taça FALINTIL. Ho núne’e klubu segunda divizaun, Estrela Baguia, ne’ebé mak hetan oportunidade hodi partispa iha eventu ne’e sente orgullu no onradu tebes ba event organizer tanba sira mós bele hola parte iha eventu refere.
“Orgullu no onra tebes ba ami hanesan direnjente klube Estrela Baguia, tanba ami nia klube bele hetan konvite no mos oportunidade atu kompete iha taça Falintil ne’e” espresa Atual Prezidente Interino AD. Estrela Baguia Helio Francisco Amaral ba JHD via WhatsApp segunda (1/08).
Nia Informa, sira nia ekipa preparadu tebes atu kompete iha tasa Falintil 2022 tanba sira nia jogador sira mos preparadu kedas ona tamba durante ne sira mos hola parte iha Pra Liga Futsal Timor Leste.
Tuir nia, sira iha tarjetu ba taça Falintil ne’e atu hetan kampiaun maibé atu sai realidade ne’e kestaun tatika husi ofisial ho jogador sira hotu tanba sei kompete ho klubu Pra Liga sira seluk, maibe ne’e laos buat foun ida ba ekipa Estrela Baguia tanba antes ne joga hasoru malu hotu ona iha pra liga Futsal Timor Leste.
Entretantu totál klubu ne’ebé mak partisipa iha eventu ne’e hamautuk 32 no tuir planu sei abertura iha loron 9 fulan Agostu tinan ne’e. No sei uza kampu Futsal FFDTL fatuhada Dili.
ADS
