Dili – Prezidenti klubu Emmanuel Fc, Aleixo Carvailho Monteiro, husu ba Asosiasaun Futeból munisípiu ho asosiasaun Profesional sira atu labele taka matan, no tenke halo moasaun sensura hasoru Prezidenti Federsaun Futeból Timor Leste (FFTL), Francisco Jerónimo, karik nia la kunpri ninia kompremisiu polítiku iha kongresu FFTL iha fulan fevereiru foin lalais ne’e.
Liu hosi kompromisiu polítika iha kongresu extra oridinariu ne’ebé mak realiza iha, loron 26 fulan fevereiru tinan 2022 ne’e Prezidenti FFTL Francisco Jerónimo komprometidu katak wainhira asosiasaun sira fó fiar hodi lídera nafatin FFTL mak nia sei realiza, Futeból Juvenil iha nivel Munisipiu tinan tinan, Formasaun ba grassroots fó treinu labarik sira tinan 8 to’o 10 iha nivel Munisipiu tenke la’o makas.
No formasaun ba atbitrajen iha nivel Nasional no Munisipiu sei kontinua hadia di’ak liu tan núne’e bele lídera jogu iha nivel rejionál no Internsional.
Nia dehan, Terseiru divizaun sei hala’o iha nivel rejionál no sei realiza Liga quarta divizaun iha nivel Munisipiu, no Kopa FFTL sei fó ba Munisipiu atu kompete.
No mós sei hadia infrastrutura, no sei hasae tan subsidiu ba Asosiasaun Munisípiu sira durante nia mandatu.
Ho komprimisiu polítika sira ne’e Francisco Jerónimo hetan fiar hosi asosiasaun sira hamutuk 11 mak fó votu Konfiansa hodi mantein lídera FFTL ba periodu 2022-2026.
Relasiona ho promesa sira ne’e Prezidenti klubu Emmanuel Fc Aleixo do Carvailho Monteiro, ezizi ba Prezidenti eleitu FFTL Francisco Jerónimo, atu kumpri sira nia kompromisiu sira ne’e.
“Ha’u nu’udar iha diretu ba votu ha’u ezizi nafatin nia, para nia tenke halo tuir rezimentu estatutu ne’ebé mak iha se nia lakoi ha’u iha diretu atu vota kontra ou Afavor” dehan Aleixo ba Jornalista iha nia knaar fatin hudi laran, Dili, (03/08).
“Agora ha’u hakarak husu ba Asosiasaun sira mós labele taka matan, sé tinan ne’e mak Asosiasaun sira haree katak ho lideransa agora dadaun ita fó votu ba sira ne’e mak la di’ak ita bele hamosu moasaun sensura extra oridinariu iha kongresu anual ne’e mais depende fila fali ba asosiasaun sira” Aleixo afirma.
Aleixo reafirma, ba Asosiasaun sira labele halerik tan tanba asosiasaun mak hili duni Prezidenti ida agora ne’e.
Asosiasaun sira mak iha kompetensia liu se sira haree la di’ak bele halo moasaun sensura kontra Prezidenti atual FFTL Francisco Jerónimo
Nia dehan, Se asosiasaun sira mak hakarak halo moasaun sensura nia mós fó votu hotu
Nia rekonese, la’ós dehan buat ne’ebé mak nia halo la di’ak maibé iha buat balu di’ak buat balu la di’ak tanba ne’e mak ida la di’ak ne’e ita kurizi para atu di’ak.
Caet
