DILI- Sekretáriu Estadu Juventude no Desportu (SEJD) sei kontinua hein proposta husi orgaun Liga Futebol Timor Leste (LFTL) atu apoiu orsamentu núne’e bele realiza liga Timorense Epoka 2022-2023.
Lia hirak ne’e hato’o husi Diretora Alta Kompetisaun SEJD, Maria Luiza Monteiru, katak, proposta ba tinan ida ne’e Federasaun balun submete ona no SEJD apoiu orsamentu atu realiza Kampionatu Nasionál, maibé liga Futebol ho Volibol mak seidauk submete.
“Kona-ba Futebol ami hein sira nia proposta husi orgaun LFTL tanba to’o agora sira seidauk submete proposta, SEJD atu atribui orsamentu hodi realiza liga epoka tinan ne’e”, tenik Maria Luiza Monteiru ba Jornalista iha nia knaar fatin SEJD, Segunda, (22/08/2022).
Nia dehan, espera iha tempu badak sira submete proposta atu realiza liga Volibol no Futebol iha tinan ne’e.
Tanba ne’e, husu ba liga Futebol Timor Leste (LFTL) atu submete lalais proposta nune’e Governu apoiu orsamentu atu realiza jogu epoka tinan ne’e.
Diretora ne’e esplika, kona-ba apoiu orsamentu ba modalidade Rua ne’e seidauk hatene loloos nia montante tanba sira seidauk submete proposta mai SEJD.
“Husi montante orsamentu ba Futebol no Volibol ami seidauk hatene tanba ami hein proposta husi sira hatama mai ne’e ho montante hira mak foin ita hatene“, dehan Maria.
Nia afirma, kona-ba Volibol sira submete ona proposta antes tiha ona, maibé SEJD Abrao Saldanha dehan Volibol tenke hahú husi Munisípiu mak mai Nasional.
Antes ne’e, Prezidente Federasaun Futebol Timor-Leste (FFTL), Francisco Jerónimo hateten, Governu liu husi Sekretáriu Estadu Juventude no Desportu (SEJD) tau ona osan dollar Amerikanu 200 Mill, no Federasaun Futeból Timor-Leste (FFTL) tau ona osan dollar Amerikanu 200 Mill, total orsamentu 400 Mill.
Entertantu, antes prezidente FFTL Fransisco Jerónimo mós deklara katak, Kalendariu jogu Epoka tinan ne’e sei hala’o iha loron 18 fulan Agostu 2022, maibé to’o ohin loron (22/08), maibé Liga ladauk realiza tanba orgaun rua sei taka ibun.
To’o notisia ne’e publika Jornalista tenta halo konfirmasaun ba parte LFTL, maibé Prezidenti LFTL laiha fatin.
Caet
