DILI- Sekretariu jerál Federasaun Futeból Timor Leste (FFTL) Gregorio Correia, informa, FFTL sei hasai desizaun hodi halo karta ba klubu sira hodi realiza Liga Timorense epoka 2022-2023
Relasiona ho karta ne’ebe Federasaun Futebol Timor-Leste (FFTL) submete ona ba Liga Futebol Timor-Leste (LFTL) hodi deskute orariu jogu epoka 2022-2023 maibé LFTL seidauk responde ho núne’e FFTL deside sei haruka karta ba klubu sira tanba Liga la iha boavontade hodi fó data Serteza ba realizasaun Liga Timorense.
“Bainhira iha tempu badak mak LFTL laiha duni boavontade ba karta husi FFTL ba realizasaun Liga Timorense epoka 2022-2023 maka FFTL sei iha desizaun rasik hodi halo karta direita ba klube sira hodi koalia direita tamba hein de’it diresaun liga to’o agora seidauk iha serteza“, dehan Sekretáriu Jerál FFTL, Gregório Correia ba jornalista sira iha edifisiu FFTL bairu grilos, kuarta (24/08/2022).
Gregorio afirma, iha loron 12 fulan Agustu liu ba FFTL manda ona karta ofisial ida ba iha orgaun LFTL hodi hatudu boavontade atu iha enkontru entre federasaun no orgaun liga hodi diskute asuntu tekniku liga ho kalendariu ba kompetisaun nian.
Tanba parte FFTL no SEJD atribui ona finansia hamutuk dollar Amerikanu 400 mill hodi realiza liga epoka 2022-2023 maibe to’o oras ne’e LFTL laiha resposta.
Tanba ne’e FFTL halo esforsu liu husi kontaktu via telefonika ho Diretór relasaun publika no apoiu tékniku LFTL nian maibé infelizmente to’o agora seidauk fo resposta tanba superior LFTL seidauk iha desizaun ruma relasiona ho karta ne’ebé parte FFTL manda ba.
Lori prezidente no estrutura tomak iha FFTL hakarak halo anunsiu ba publiku katak FFTL no SEJD iha ona klareza ba realizasaun liga Timorense epoka 2022-2023 no hein deit orgaun liga sira nia resposta ba karta ne’ebé FFTL haruka tiha ona ba hodi hahu organiza liga Timorense ba epoka ne’e.
“Ami husi federasaun rasik la aguenta ona atu hein tan tanba públiku kestiona katak FFTL mak labele organiza liga maibé publiku mos tenke hatene katak iha Timor ita iha orgaun liga no se FFTL deit ami halo tiha ona“, katak nia.
Gregorio dehan, tenke konsidera malu no mesak hadomi futebol deit ikus mai FFTL mak hetan fali buat ladi’ak nune’e husu ba publiku atu hatene katak FFTL hanesan aman no inan ba bola maibé orgaun liga mak iha kompetensia atu organiza liga la’os FFTL.
FFTL sei nafatin fo konsiderasaun ba orgaun LFTL no solusaun ikus fo tan biban semana ida atu orgaun liga fo resposta ba karta husi FFTL antes tama ba 01 Setembru no bainhira laiha maka FFTL sei foti inisiativa hodi konvoka reuniaun ho klube sira hodi hanoin hamutuk liga epoka 2022-2023 ba oin.
Caet
