Dili — Klubu Primeira Divizaun Liga Futsal Timor-Leste, São Francisco Xavier, susesu hadau bileti ida hodi hatuur aan iha meus finais Taca FALINTIL Futsal 2022, hafaoin manán nia ekipa adversariu Malkamer Fc iha jogu quartu finais ne’ebé mak realiza iha kampu Futsal FFDTL fatuhada Dili, sabadu, (27/08).
Iha inisiu jogu ekipa rua hotu hotu hatudu jogu furak liu hosi estrajia tekniku no tatika hosi kada ekipa maibé Sorte di’ak monu liu ba ekipa Sao Fransisco Xavier hodi lídera uluk ho score 1-0 liu hosi jogador Remigio.
Tama ba iha minutu 7 Malkamer Fc, konsege responde hikas liu hosi jogador Ameta, hodi halo empata score ba 1-1.
Ho golu ne’e jogu kontinua manas liu tan liu hosi kontra no atake ba malu ho núne’e tama ba iha minutu 13 rede Malkamer nakdoko fila fali hafaoin Elderino marka golu ida hodi lori nia ekipa Sao Fransisco Xavier lídera ho score 2-1.
No tama ba iha minutu 18, Venceslau Fatima, marka tan golu ida hodi haboot liu tan score ba 3-1, ho score refere mantein to’o termina jogu primeira parte.
Kontinua segunda parte ekipa rua mantein lansa kontra ataka ba malu ho ritmu jogu ne’ebé mak aas maibé ekipa Malkamer ne’ebé mak sofre uluk ona golu iha Primeira parte hamihis score ba 2-3 hafaoin Z-Vinhos, marka golu ida iha minutu 24.
São Francisco Xavier, haboot fila fali score ba 4-2, hafaoin Lorenco Xavier fura rede Malkamer Fc iha minutu 27.
Tama ba iha minutu 30 Lorenco Xavier marka tan nia naran hodi haboot liu tan score ba 5-2.
Malkamer Fc foin hamihis score ba 5-3 hafaoin Paulo Gally Freitas marka nia naran iha minutu 35.
São Francisco Xavier, haboot fila fali score ba 6-3 hafaoin Remigio produs fila fali golu ida hodi marka nia naran iha minutu 37.
Tama ba iha minutu 38, Ebben konsege marka golu ida hodi hatuur score ba 6-4.
No tama ba iha minutu 39 Alex Mauri produs golu ida hodi muda score ba 6-5, ho score refere mantein to’o termina jogu segunda parte vitória ba São Francisco Xavier.
Hosi rezultadu vitoria ne’e lori ekipa São Francisco Xavier iha diretu atu hetan bileti ida hodi Kompleta jogu meus finais Taca FALINTIL Futsal 2022.
Enkauntu Malkamer Fc elimina ona hosi Taca FALINTIL Futsal 2022 tanba jogu refere Quartu finais refere ho sistema bota fora ka lakon sai.
Entretantu jogu ne’e ho objetivu atu komemora loron FALINTIL ba dala 47 ne’ebé mak monu iha loron 20 fulan Agostu tinan ne’e.
Ekipa kobertura JHD
