DILI- Saralima Fc susesu hakat ain ba final Taca FALINTIL Futsal 2022, hafaoin halakon nia ekipa adversariu hosi primeira divizaun Liga Futsal Timor-Leste, São Francisco Xavier ho score 3-2 iha jogu Semi Final, vitoria hosi Saralima Fc, marka hosi jogador Bendito Ramos.
Hala’o jogu iha kampu Futsal FFDTL fatuhada, Dili, Segunda, (29/08/2022), husi inisiu jogu parte dahuluk ekipa rua lansa kedas kontra ataka ba malu maibé ekipa São Francisco Xavier hatudu ritmu jogu ho di’ak maibé la konsege halo golu.
Enkuantu ekipa rua ne’e kontra atake ba malu, nune’e ekipa Saralima Fc muda tekniku no tatika ekipa atu sobu guarda rede São Francisco Xavier maibé defeza la fo fatin atu podus golu, ho nune’e iha minutu 15 jogadór Bendito Ramos konsege lansa golu ho score 1-0 .
Ho vitoria ne’e halo adeptus futsal sira kontente no hakilar bele aumenta tan golu, liu de’it minutu 17 jogadór Lorenco Xavier konsege sobu guarda rede hodi muda score 1-1.
Maibé ekipa Saralima Fc la hamate nia ritmu jogu nune’e iha minutu 19 jogadór Bendito Ramos konsege hamorin tan nia naran hodi muda score ba 2-1.
To’o jogu parte dahuluk remata ekipa rua ne’e la iha muda golu ho nune’e mantein ho score 2-1.
Kontinua ba jogu parte daruak ekipa rua mantein lansa kontra atake ba malu liu hosi tekniku no tatika ida idak nian maibé la konsege produs tan golu.
No iha minutu 30 ekipa Saralima Fc halo mudansa tatika hodi hatuur score ba 3-1 nafatin liuhosi jogadór Bendito Ramos ho rezultadu ne’e ekipa Sao Francisco Xavier la dukur jogadór Simson konsege muda score ba 2-3.
Ho nune’e to’o termina jogu segunda parte vitória ba Saralima Fc ho score 3-2 hodi tama ba final taca Falintil futsal 2022.
Iha jogu final Saralima Fc sei hasoru ekipa Mauputar Fc ne’ebé mak halakon Boa Sorte Fc ho score 5-2.
Enkuantu jogu final ba Taca FALINTIL Futsal 2022 ne’e sei hala’o kampu Futsal FFDTL fatuhada Dili iha loron 02 fulan Setembru tinan ne’e.
Enteretantu jogu ne’e ho objetivu atu komemora loron FALINTIL ba dala 47 ne’ebé mak monu iha loron 20 fulan Agostu tinan ne’e.
Caet
