Dili– Klubu primeira divizaun Liga Futsal Timor-Leste Mauputar Fc, susesu hakat ain ba final Taca FALINTIL Futsal 2022, hafaoin hurlele Boa Sorte Fc ho score 5-2 iha meias finais ne’ebé mak realiza iha kampu Futsal F-FDTL Fatuhada, Dili, Segunda, (29/08).
Iha inisiu jogu ekipa rua lansa kedas presaun ba malu liu hosi kontra no atake ba malu maibé defeza hosi kada ekipa mantein solidu hodi la fó fatin ba malu hodi bele produz golu.
Maibé ekipa Mauputar Fc ne’ebé mak fó presaun makas ba Boa Sorte Fc, ne’e konsege hetan dalan hodi produs golu Primeiru liu hosi jogador, Davidson iha minutu 9, hodi muda score ba 1-0.
Boa Sorte Fc foin responde golu ida iha minutu 14 liu hosi jogador Jamitu dos Santos hodi hatuur score ba 1-1.
Ho golu ne’e jogu kontinua manas liu tan ho nune’e tama ba iha minutu 19, Mário Moniz marka fila fali golu ida hodi lori nia ekipa Maup Fc lídera ho score 2-1 to’o termina jogu primeira parte.
Kontinua ba jogu segunda jogu la’o kedas ho intensidade ne’ebé mak aas maibé ekipa Mauputar Fc ne’ebé mak mai ho materia kualidade lansa tan golu ida hodi haboot score ba 3-1 iha minutu 28 liu hosi jogador, Ferry Pinto.
No tama ba iha minutu 30, Boa Sorte Fc konsge hamihis fila fali score ba 3-2 hafoin jogador Rafael Fatima fura rede Mauputar Fc.
No Tama ba iha minutu 38, Mauputar Fc haboot fila fali score ba 4-2, liu hosi jogador, Vava.
Ho golu ne’e halo ekipa Boa Sorte Fc, lakon vontade ikus mai ekipa Mauputar Fc, produs tan golu ida hodi hatuur score ba 5-2, ho score refere mantein to’o termina jogu segunda parte vitória ba Mauputar Fc.
Enkuantu hosi jogu seluk Saralima Fc konsege manán São Francisco Xavier hodi hakat ba final
Ho núne’e iha jogu final Taca FALINTIL Futsal 2022 Mauputar Fc sei hasoru ekipa Saralima Fc ne’ebé mak sei hala’o iha loron 02 fulan Setembru tinan ne’e.
Enkuantu ekipa Boa Sorte ne’ebé mak derota sei hasoru fila fali São Francisco Xavier hodi hadau pozisaun terseiru lugar nian ne’ebé mak tuir orariu jogu refere sei hala’o iha kampu Futsal FFDTL fatuhada Dili loron 01 fulan Setembru tinan ne’e.
Enteretantu jogu ne’e ho objetivu atu komemora loron FALINTIL ba dala 47 ne’ebé mak monu iha loron 20 fulan Agostu tinan ne’e.
Ekipa kobertura JHD
