Ermera — Café Ermera Fc, susesu sai kampeaun ba Kopa Asosiasaun Futeból Munisípiu Ermera (AFM-E) 2022, hafaoin halakon nia ekipa adversariu Fc Leopa ho score 1-0 iha final. Golu vitoria hosi ekipa Café Ermera Fc, nian ne’e marka hosi jogador Emeliando Soares.
Jogu entre ekipa rua ne’e hala’o iha Estadion Munisipal Cafe De Ermera, Gleno, tersa, (30/08), ekipa rua ne’e iha inisiu kedas lansa kontra atake ba malu liu hosi tekniku no tatika ida idak nian.
Ekipa Café Ermera Fc, ne’ebé mak nu’udar reprezenta Ermera ne’e konsge lansa kedas presaun ne’ebé makas desde inisiu.
Maibé ekipa Leopa Fc, ne’ebé mak reprezenta hosi munisipiu Liquica ne’e mós lakohi fó espasu ba Café Ermera Fc hodi produs golu ho núne’e to’o termina jogu primeira parte score mantein okulista 0-0.
Kontinua ba jogu segunda parte ekipa Leopa Fc konsege lansa kedas presaun ba Café Ermera maibé oportunidade hirak ne’e la konsege finaliza ho di’ak.
No tama ba iha minutu 58, Café Ermera Fc, lídera hikas ho score 1-0, hafoin jogador, Emeliando Soares marka nia naran liu hosi nia asaun hodi fura rede Leopa Fc.
Ho score refere jogu kontinua manas liu tan maibé la iha tan golu ruma mak akontese to’o termina jogu segunda parte vitória ba ekipa Café Ermera Fc hodi sai Kampeaun ba Kopa AFM-E 2022.
Enkuantu Leopa Fc obrigado tenke simu realidade hodi tuur iha pozisaun segundu ka runer-up.
Terseiru lugar ba Kopa AFM-E monu ba ekipa Fc Vila Ataúru no kuartu Lugar monu ba Maubale Fc.
Entretantu Kopa AFM-E 2022 ne’e partispa hosi klubu hamautuk 18 no evntu ne’e rasik realiza ba daruak nia no ba dahuluk ekipa Tuna Fc mak sai Kampeaun iha tinan 2021.
CharllY Junior
