DILI– Relasiona ho Federsaun Futeból Timor-Leste (FFTL) ne’ebé mak fulan 9 ona la selu jogador selesaun nasional sira nia direitu no mós deve Treinador selesaun nasionál Fabio Joaquim Marcial da Silva durante fulan 5 ne’e, eis Sekretariu jerál FFTL Nelio Isac Sarmento sente triste no konsidera ne’e erru boot hosi FFTL.
Federasaun Futeból Timor-Leste (FFTL) to’o oras ne’e seidauk selu subsidiu ba jogador selesaun nasionál Timor Leste maske fulan 9 ona no atu besik ona fulan 10.
Selesaun nasional defende Bandeira RDTL desde iha fulan Dezembru tinan kotuk liu ba hodi ba kompete iha eventu internasional Suzuki Cup iha Tailandia no kontinua defende Timor Leste iha jogu AFF sub-23 iha Kambodia iha fulan fevereiru 2022 no susesu sai terseiru lugar ba iha eventu refere.
No iha fulan Maiu tinan ne’e kontinua defende Timor Leste iha eventu Asian Games edisaun 31 iha Vietnam no kontinua hala’o TC iha Qatar maibé viajen sira ne’e FFTL sei deve hela no to’o oras ne’e seidauk selu.
Núne’e mós Treinador ho nasionalidade Brazil Fabio Marcial nia salariu fulan 5 Federsaun ladauk selu ho núne’e Treinador ne’e deside hakotu nia kontratu ho FFTL. Maski tuir loloos kontratu Treinador ne’e remata iha fulan Dezembru maibé tanba FFTL la selu fulan 5 ho núne’e Treinador rasik deside rejigna aan.
Tuir informasaun ne’ebé mak JHD asesu katak Treinador Fabio Marcial kada fulan hetan vensimentu ho montante rihun 10.000 ho núne’e durante fulan 5 la selu ne’e hamutuk 50.000 dólar Amerikanu.
Ho situasaun hirak ne’e eis Sekretariu jerál Federsaun Futeból Timor-Leste (FFTL), Nelio Isac Sarmento sente triste tanba FFTL la tau prioridade ba Treinador ho jogador.
Nia dehan, Uluk nia sei Sekretariu jerál nia prinsipiu mak jogador no Treinador ne’e prioridade sira mak tenke kria kondisoens ba di’ak kedas depois mak haree restu.
“Mais ate agora mak ha’u rona jogador sira fulan 9 ona sira nia osan saku ka subsidiu ba sira to’o agora seidauk simu ne’e ba ha’u triste tebes” Dehan eis Sekretariu jerál FFTL Nelio Isac Sarmento ho sentimentu triste iha Sede CNRT Bairru gerilus Dili, kinta, (22/09).
“Federsaun labele husik jogador sira sai hanesan ne’e bainhira kuandu jogador ho Treinador sira sei hanesan ne’e ita lalika ko’alia prestasaun” nia komenta .
Nia haktuir, Tanba la iha buat ida motiva sira atu halo prestasaun tanba ne’e husu ba ezekutivu sira atu tuur atu hola desizaun núne’e ba futuru bolu jogador foun karik sira bele iha vontade hodi defende sira nia nasaun.
“La’ós tanba Osan ne’e maibé tanba dignidade jogadores, labele ita haree fali selesaun nasionál Timor ne’e hanesan pengemis iha fali ema nia rain ne’e labele dignidade ita ko’alia dignidade nasaun nian dignidade jogadores ne’ebé defende estadu” Tenik nia
“Ha’u fiar katak Federsaun sei fó solusaun ba ida ne’e ita espera katak sira mós sente oinsá atu bele fó Solusaun lalais ba problema jogador ho Treinador ne’ebé seidauk simu osan ne’e” nia hakotu.
Antes ne’e selesaun nasionál Timor Leste halo ona konferensia imprensa hodi ezizi sira nia direitu no sira mós lamenta tebes ho FFTL ne’ebé mak atende uluk sira nia funsionsriu nia salariu fulan rua tama dala ida maibé abandona fali direitu jogador sira Nian.
Núne’e mós antigu Jogador mós sente triste tanba FFTL la selu direitu jogador sira nia no atende uluk mak staff ka funsionsriu sira iha FFTL ne’e.
Caet
