Dili– Governu liu husi Ministériu Edukasaun Joventude no Desportu hamutuk ho Sekretariu Estadu Joventude no Desportu atribui ona premiu ba atletas no tekniku sira ne’ebe hatudu ona prestasaun iha eventu rejional rua Sea Para Games Solo no Asean University Games (AUG) Thailandia.
Ministériu Edukasaun Joventude no Desportu(MEJD) Armindo Maia hatete, Ohin mai hamutuk iha ne’e atu atribui premiu ba atleta sira ne’ebe mak sai manan nain iha jogus desportu nivel rejional rua ne’ebé partisipa iha tinan ida ne’e
Jogus SEA Para Games 2022 iha Solo, Indonesia no ASEAN University Games iha Thailandia no husi jogus rua ne’e, atleta hamutuk besik nain 20 mak oferese medalla ba Timor Leste.
“Tuir ita nia lei no regulamentu ne’ebé mak iha, Estadu atribui premiu iha forma finanseiru ba ita nia atleta manan nain sira ne’e no ita sei atribui premiu ba ita nia atleta manan nain hirak ne’e“,Dehan MEJD wainhira partisipa iha serimonia atribuisaun premiu iha SEJD Lecidere,Tersa(20/12).
Nia haktuir lori Governu nia naran, hakarak atu hato’o parabens ba manan nain sira husi Jogus SEA Para ames 2022 no ASEAN University Games 2022 ho sira nia jestor no treinador sira.
“Hau hein atribuisaun premiu dader ida ne’e husi governu, la’os fo satisfasaun ka kepuasan ba maluk atleta manan nain sira ho sira nia prestasaun. Maibé, ha’u hein katak atribuisaun premiu ohin ne’e sei fo insentivu no enkoraza ita boot sira atu luta no hasa’e liu tan ita boot sira nía prestasaun hodi utiliza premiu hirak ne’e atu tulun ita boot sira hadiak liu tan ita boot sira nia record pessoal“,Nia informa
Iha fatin hanesan Xefe Misaun Asean University hanesan mos Prezidente Federasaun Desportu Akademiku Timor-Leste (FDATL) Zeferino Viegas Tilman informa FDATL hanesan Federasaun ida ne’ebe mak nu’udar mahan ba atividade desportivu sira hotu
Iha tinan 2022 Federasaun partisipa iha Eventu Asean University Games iha Thailandia iha ne’ebe partisipa ho modalidade haat hanesan Volly praia,Xadres,Atletismu no Taekwondo
“Husi modalidade haat ne’e konsege lori atleta 12 ofisial nain haat no mos treinador nain haat, rezultadu husi Asean University Games iha Thailandia nee ita konsege lori medalla haat mai TL“,Dehan nia
Nia dehan, Medalla haat nee kontribui husi atleta Felisberto de Deus nudar Terseiru lugar ba iha 10.000 metrus no 2 lugar ba 5000 metru ne’ebe nia kontribui medalla rua
Medalla seluk kontribui husi Ana da Costa Belo husi Modalidade Taekwondo hetan Terseiru lugar no ida husi seluk hosi Atleta Mane nain rua hosi Modalidade Volly praia mak Tito Morais Gusmão no Joel Savio Valente nu’udar Terseiru lugar iha eventu ne’e
Eventu ne’e nia kontinuasaun iha 2024 sei realiza iha Surabaia Indonezia espera katak TIMOR-LESTE sei nafatin kontribui medalla husi atleta sira ne’ebe mak sei partisipa iha eventu ne’eba
Nune’e Sekretariu Jeral Komite Paralimpic Nasional Timor-Leste (CPNTL) Jose Da Silva Monteiro informa, iha tinan ida ne’e modalidade tolu mak partisipa iha Asean paragames ba dala 11 iha Solo Indonezia
Modalidade tolu ne’e mak hanesan Atletismu,Tenis meza no hiit besi husi paratisispasaun Athleta 15, ofisiais 10 husi ida ne’e Atleta Paralimpic Timor-Leste hetan medalla osan mean 5, osan mutin 2 no osan metan 5 hamutuk 15
“Ita kontente tanba ita ba kompete konsege hetan rezultadu diak tan ne’e ami kontinua la’o nafatin ba oin no Ami agradese ba SEJD no Diretores Jerais sira hotu ne’ebe sempre tau matan ba ami Paralimpic mos bele konkista prestasaun ba iha mundu internasional“,Nia dehan
Tinan oin mai CPNTL kontinua prepara tan atleta atu ba kontinua kompete iha Kambodia no China
Entretantu Premiu ne’ebe atleta Asean University Games mak hanesan atleta husi Modalidade Atletismu Felisberto de Deus ho montante $1,750.00, Modalidade Taekwondo Ana da Costa Belo $750 no husi Voleibol praia mane atleta nain rua Tito Morais Gusmão no Joel Savio Valente nu’udar Terseiru lugar iha eventu ne’e $468.75
No Jogus Sea Para Games hanesan Teofilo Freitas ne’ebe $10.500.00, Domingas Da Costa $2,500 ho Domingos Pereira $2,500 no treinadora Odete Belo $2,500
Hosi Modalidade hiit besi Jose Antonio A. Serano ne’ebe kompete iha 65kg hetan premiu $3,000.00 no Treinador Joao Henrique de Deus $1,500.00
Hosi Modalidade tenis meja Atleta Abelita F. Borges hetan prêmiu osan montante $2,500.00, Pascoela Pereira $4.000. 00, Bernardo de Carvalho 750, 00 no treinador Rogerio T. C. Soares hetan $1, 500.00
Charlly junior
