DILI– Sentru Juvenil Munispiu Baucau susesu xave metin ninia titulu kampeaun ba eventu juvenil nasional no festival Kopa sub-16 epoka 2022, hafoin dere nia adversariu Sentru Juvenil Munispiu Bobonaro ho score 3-0 iha final.
Jogu entre ekipa rua ne’e hala’o iha Estadion munisipal Dili, sabadu (17/12), ekipa sentru juvenil Baucau ne’ebe mak nu’udar kampeaun iha epoka 2021 nian ne’e kontinua hatudu performa berliante ho ambisaun hakarak save metin titulu kampeaun ba eventu refere.
Ho nunee iha jogu Primera parte ekipa juvenil munispiu Baucau tun kedas ho ritmu ne’ebe makaas hi nunee jogu foin hala’o deit minutu 6 Aquelino Marques susesu fura ona rede Sentru Juvenil Munispiu Bobonaro nian hodi lori Baucau lidera uluk ho score 1-0.
Score refere halo ekipa juvenil munispiu Baucau ne’ebe mak nu’udar iha mentalidade kampeaun ne’e esforsu liu tan ho nunee tama ba minutu 9 ekipa juvenil munispiu Baucau fura tan rede Bobonaro nian liu hosi jogador Celio Soares, hodi muda aumenta score ba 2-0.
Score 2-0 halo jogu hahu manas liu hosi kontra atake ba malu maibe la iha tan golu ruma mak akontese to’o termina jogu Primera parte score mantein 2-0.
Kontinua ba jogu segunda parte ritmu jogu manas liu tan ba ekipa rua hodi lansa kontra atake ba malu maibe tama ba iha minutu 49 Sentru Juvenil Munispiu Baucau haboot liu tan score ba 3-0 liu hosi jogador Enedino Yoman.
Score 3-0 hasae liu tan intensidade jogu iha segunda parte maibe la iha tan golu ruma mak akontese to’o termina jogu segunda parte Vitoria ba Sentru Juvenil Munispiu Baucau hodi save metin titulu kampeaun iha Kopa Juvenil 2022.
Ho rezultadu Primeru lugar ne’e sentru juvenil Baucau iha direitu atu foti premiu osan ho montante $600
Ekipa sentru juvenil munispiu Bobonaro ne’ebe mak okupa Segundu lugar iha diretu atu hetan premiu osan ho montante $500 USD.
Enkuantu ekipa sentru juvenil munispiu Dili-A ne’ebe mak sa’i terseiru lugar iha diretu atu hetan premiu osan ho montante $400.
No ekipa Covalima ne’ebe mak okupa iha kuartu lugar hetan premiu osan ho montante $300.
Eventu juvenil nasional no festival Kopa sub-16 epoka 2022, ne’e kompete hosi munispiu hamutuk 7 mak hanesan Dili, Bobonaro, Baucau, Lautem, Ermera, Covalima no Ermera.
CharllY Junior
