DILI– Klubu segunda divizaun As Marca sei hala’o hela negoisasaun ho jogador husi estranjeiru atu reforsa klubu refere durante epoka 2022-2023.
“Ami iha pensamentu ne’ebe mak dook tebes maibe pensamentu ha’u hanesan treinador hakarak iha posibilidade Marca ho estranjeiru ha’u hanoin ami bele sei iha negosiasaun nia laran” informa Treinador As Marca Octavio da Costa Alves Soares ba jornalista iha Kampu futebol Delta-04, Dili, Kinta (02/02).
“Ha’u hanoin hanesan nasaun vizinhu hanesan Indonesia Kupang sira ne’ebe mak mais komprende bele tuir liga entaun ami halo aprxima se karik jogador hosi estranjeiru hanesan Ganha ida ou rua” Nia Informa.
Enkuantu Konaba perparasaun Treinador ne’e afirma, sira foin hala’o perparasaun semana ida resin, maibe sei perpara masimu liu tan molok kompete iha liga.
Treinador ne’e afirma dadaun ne’e AS Marca iha jogador nain 30 maibe Sira sei tais iha sabadu semana ne’e hodi hili jogador nain 25 hodi kompete iha liga Timorense.
“Primeru tanba sei halo selesaun se karik ha’u halo selesaun remata ona signifika ne’e ha’u garante katak sira ne’ebe mak tama ona linha de jogu entaun ha’u garante ba kompete iha segunda divizaun i pasti ami perpara masimu liu tan” Nia hakotu.
As Marca rasik too agora seidauk rejistu jogador iha orgaun liga futebol Timor Leste,(LFTL).
Entertantu klubu sira ne’ebe iha diretu absoluta hodi partisipa iha liga Timorense ba Primeru divizaun mak hanesan As Ponta Leste, Assalam Fc, Karketu Dili Fc, AD SLB, Emanuel Fc Aitana Fc, Academica Fc, Portu Taibesi no Atletico Ultramar/Coracao Fc.
Enkuantu hosi segundu divizaun mak hanesan DIT Fc, Lica-Lica Lemorai, Nagardjo, Fitun Estudiante Fc, As Marca, Boavista Fc, no Zebra Fc.
DVO
