DILI — DIT Fc festa golu kontra adversariu Nagardjo Fc ho score 4-0, iha jogu kontinuasaun jornada daruak segunda divizaun Liga Timorense ba epoka 2022-2023.
Jogu entre ekipa rua ne’e hala’o iha Estadion Munisipal Dili kinta, (08/03) iha inisiu jogu ekipa rua ne’e hotu hotu hala’o jogu ho atrativu hodi lansa kontra atake ba ba malu maibe ekipa DIT Fc ne’ebe mak hatudu ritmu jogu ho diak konsege domina bola hodi lansa golu dahuluk ba rede Nagardjo Fc liu hosi jogador Serafim Bareto iha minutu 27.
Ho golu ne’e jogu komesa manas liu tan no tama ba iha minutu 34 DIT Fc haboot liu tan score ba 2-0 liu hosi jogador Elvis Silva.
Avansadu ho numeru kamizola 9 ne’e marka golu hafoin hetan bola barulu iha area grandeal Nagardjo Fc nian.
Ho score 2-0 ne’e la iha tan golu ruma mak akontese to’o termina jogu primeira parte.
Kontinua ba jogu segunda parte ekipa rua ne’e kontinua lansa kontra atake ba malu liu hosi tekniku no tatiku ida idak nian maibe defeza hosi ekipa Nagardjo Fc ne’ebe mak ladun solidu halo ekipa DIT Fc marka tan golu ida liu hosi jogador Xavier Silva Bait, iha minutu 73 hodi muda aumenta score ba 3-0.
Score refere halo jogu komesa manas liu tan ba ekipa rua ne’e maibe ekipa DIT Fc ne’ebe mak hatudu ritmu no nafatin domina bola ho nune’e tama ba iha minutu 90+2 jogador Xavier Silva Bait, hamorin tan nia naran hodi termina festa golu ho score 4-0.
Hosi rezultadu vitoria ne’e hatuur ekipa DIT Fc ukun provizoriu tabela klasifikasaun Segunda divizaun Liga Timorense ho pontus 6 hosi jogu rua manan hotu.
Enkuantu ekipa Nagardjo Fc iha pozisaun 8 ka ikus liu ho pontus 0 hosi jogu rua derota hotu.
DVO
