DILI — Deonizio Da Silva sa’i heroi hafoin lori marka golu ida iha minutu krusial hodi lori nia Zebra Konkista vitoria kontra adversariu Fiel Fc ho score 1-0.
Jogu entre Zebra Fc kontra Fiel Fc ne’e hala’o iha Estadion Munisipal Dili, Segunda, (06/03).
Iha inisiu jogu primeira parte ekipa rua hotu hotu hatudu jogu ho kuidadu hodi asegura pozisaun ho nune’e lansa presaun ba mai ho ritmu ne’ebe mak naton ho nune’e to’o termina jogu primeira parte score mantein okulista 0-0.
Kontinua ba jogu segunda parte ekipa rua komesa hatudu jogu furak hodi lansa kontra atake ba malu.
Maibe ekipa Zebra Fc ne’ebe mak hatudu liu ritmu jogu konsege domina liu bola hodi lansa presaun makas ho nune’e tama ba minutu 88 Zebra Fc lidera provizoriu ho score 1-0 liu hosi asaun Deonizio Da Silva.
Futebolista ho numeru kamizola 17 ne’e marka golu liu hosi suta dook hodi fura rede Fiel Fc.
Ho score refere jogu sa’i manas liu tan ba ekipa rua ne’e hodi lansa kontra atake ba malu maibe la iha tan golu ruma mak akontese to’o termina jogu segunda parte vitoria ba Zebra Fc ho score 1-0.
Hosi rezultadu vitoria ne’e lori ekipa Zebra Fc sa’i hosi jona degradasaun hodi okupa iha kintu klasifikasaun provizoriu ho pontus 3 hosi jogu rua manan ida no derota dala ida.
DVO
