DILI — Fc Porto Taibesse hader hikas hodi liki adversariu Academica Fc ho score 2-1, iha jogu kontinuasaun primeira divizaun Liga Timorense ne’ebe mak hala’o iha Estadion Munisipal Dili Domingu (05/03).
Jogu hahu ekipa rua iha ambisaun hodi rekoila pontus tolu hodi asegura tabela klasifikasaun maibe arbitu foin huu apitu lian iha linha sentra Academica Fc halo kedas atake ho nune’e jogu foin lao deit 20 segundus rede Fc Portu Taibesi nakdoko ona liu hosi asaun Nortey Kojo.
Ho golu sedu ne’e halo armada dragon hakfodak hodi lansa kontra atake ba Academica liu hosi ain ba ain ho nune’e tama ba iha minutu 21 Fc Porto Taibesse konsege produs golu ida hodi halo balansu ba score sai 1-1 liu hosi asaun Lazio Piedade.
Ho golu ne’e ekipa rua ne’e la hatun sira nia ritmu jogu ho ekipa Academica Fc hatudu jogu kalma hosi ain ba ain, enkuantu ekipa Fc Porto Taibesse hala’o jogu ho bola a’as maibe to’o termina jogu primeira parte la iha tan golu ruma mak akontese score mantein 1-1.
Kontinua ba jogu segunda parte intensidade jogu komesa sae liu tan ho nune’e tama ba iha minutu 54 Yohanes Jehaman fura rede Academica Fc hodi lori nia ekipa Fc Portu Taibesi lidera ho score 2-1.
Ho Golu ne’e jogu sa’i manas liu tan ba ekipa rua ne’e hodi lansa kontra atake ba malu maibe defeza hosi kada ekipa mantein solidu ho nune’e la iha tan golu ruma mak akontese to’o termina jogu segunda parte vitoria ba Fc Portu Taibesi ho score 2-1.
Hosi rezultadu vitoria ne’e hatuur ekipa Fc Porto Taibesse sa’i hosi jona degradasaun hodi hakat ba iha pozisaun 5 iha tabela klasifikasaun provizoriu ho pontus 3 hosi jogu rua manan ida no derota ida.
Enkuantu ekipa Academica Fc mantein iha segundu klasifikasaun ho pontus 4 hosi jogu tolu manan ida empata ida no derota ida.
DVO
