DILI– Lica-Lica Lemorai Fc, hader hikas hodi tidin nia adversariu Santa Cruz Fc ho score 2-1, iha jornada daruak rezultadu vitoria ne’e armada Lica-Lica Lemorai hakat sa’i hosi jona mean no dudu tun ekipa Santa Cruz ba zona degradasaun segunda divizaun Liga Timorense epoka 2022-2023.
Jogu entre ekipa rua ne’e hala’o iha Estadion Munisipal Dili Kinta (09/03) ekipa rua ne’e hala’o jogu ho ambisaun aas hodi buka oportunidade atu marka golu desde inisiu jogu.
No tama ba iha minutu 14 Lica-Lica Lemorai Fc tenke sofre uluk golu hafoin linha defensivu hosi Lica-Lica Lemorai Fc Elias Gomesa halo auto golu. Ho nune’e ekipa Lica-Lica Lemorai Fc Santa Cruz Fc lidera ho score 1-0.
Ho score ne’e jogu sa’i manas liu tan ba ekipa rua ne’e hodi lansa kontra atake ba malu maibe la iha golu ruma mak akontese to’o termina jogu primeira parte.
Kontinua ba jogu segunda parte ekipa Lica-Lica Lemorai Fc ne’ebe mak sofre uluk golu ida iha primeira parte halo kedas mudansa ba tatika ho nune’e tama ba iha minutu 60 Andre Sarmento susesu fura rede Santa Cruz Fc hodi halo balansu ba score sai 1-1.
Ho score refere intensidade jogu komesa manas no tama ba iha minutu 70 Lica Lica-Lica Lemorai Fc lidera hikas ho score 2-1 hafoin jogador Inacio Magno marka golu ida.
Ho score refere jogu sa’i manas liu tan ba ekipa rua maibe la iha tan golu ruma mak akontese to’o termina jogu segunda parte vitoria ba Lica-Lica Lemorai Fc ho score 2-1.
Hosi rezultadu vitoria ne’e hasai ekipa Lica-Lica Lemorai Fc hosi zona mean Enkuantu dudu tun ekipa Santa Cruz ba zona degradasaun ho pontus 0 hosi jogu rua derota hotu.
DVO
