DILI — Fc Portu Taibesse hamoe Assalam Fc ho score 3-0, iha jogu kontinuasaun primeira divizaun jornada datoluk Liga Timorense epoka 2022-2023.
Hala’o jogu iha Stadion Munisipal Dili, kuarta, (15/03) iha inisiu jogu primeira parte ekipa rua hotu hotu hatudu jogu furak iha kampu hodi atrai adeptus futebollovers sira hotu ne’ebe mak asiste direta jogu refere.
Fc Porto Taibesse ne’ebe mak starter ho jogador lokal iha inisiu jogu konsege hatudu tatiku ne’ebe mak furak maibe assalam fc mantein linha metin hodi la fo fatin ba Fc Portu hodi marka golu.
Enkuantu atake ne’ebe mak lansa hosi ekipa Assalam Fc defeza hosi Fc Portu Taibesi mantein disiplina no solidu hodi la fo fatin ba assalam fc ho nune’e to’o termina jogu primeira parte score mantein okulista 0-0.
Kontinua ba jogu segunda parte Fc Portu Taibesi ne’ebe mak halo mudansa ba tatika liu hosi substituisaun ba jogador hodi hasai Jardel Piedade hodi hatama fali jogador estarjeiru Yohanes Jehaman konsege hetan rezultadu pozitivu ho nune’e tama ba iha minutu 50 Fc Portu Taibesi konsege lidera ho score 1-0 liu hosi jogador Yohanes Jehaman.
Jogador ho nasionalidade Indonesia ne’e marka golu hafoin hatudu nia asaun hodi fura rede Assalam Fc ne’ebe mak hein hosi Nathaniel Agbozo.
Ho golu ne’e jogu sa’i manas liu tan ba ekipa rua no tama ba iha minutu 73 Fc Porto Taibesse haboot liu tan score ba 2-0 liu hosi jogador Edencio Da Costa. Jogador ho numeru kamizola 13 ne’e marka golu liu hosi suta livre.
Ho golu ne’e tensi jogu komesa manas liu tan ho nune’e tama ba iha minutu 90+6 Yohanes Jehaman hamorin tan nia naran hodi haboot score sa’i 3-0.
Avansadu ho numeru kamizola 10 ne’e marka golu hafoin halo atake ne’ebe lais hodi kedok guarda rede Nataniel Agbozo hafoin Marka golu.
Ho score 3-0 ne’e mantein to’o termina jogu segunda parte vitoria ba Fc Portu Taibesi.
Hosi rezultadu vitoria ne’e hatuur ekipa Fc Portu Taibesi iha pozisaun datoluk ho Pontus 6 rabat ekipa AD SLB no Assalam Fc ne’ebe mak iha pozisaun dahuluk ho pontus 7.
DVO
