DILI — AD SLB susesu lidera provisorio tabela klasifikasaun primeira divizaun Liga Timorense, hafoin halakon nia adversariu Academica Fc ho score 2-0.
Jogu entre AD. S.L.B. kontra Academica Fc ne’e hala’o iha Estadion Munisipal Dili, Tersa, (14/03).
Iha inisiu jogu primeira parte ekipa rua tun ambisaun aas hodi lansa kontra atake ba malu liu hosi tekniku no tatiku ida idak nian.
Ekipa AD. S.L.B. ne’ebe mak tun ho ritmu jogu ne’ebe mak aas konsege lansa suta fila fila ba rede Academica Fc ho nune’e jogu foin hala’o minutu 6 AD. S.L.B. lidera kedas ho score 1-0 liu hosi jogador Michel Hutabarat.
Jogador nasionalidade Chile ne’e marka golu hafoin aproveita bola barulu iha area grandeal laran.
Ho golu ne’e hasae liu tan tensi jogu ekipa Academica Fc ne’ebe mak sofre uluk golu ida konsege domina hikas bola hodi lansa presaun liu hosi bola ain ba ain maibe atake ne’ebe mak lansa hosi Academica Fc seidauk bele rezulta golu ho nune’e to’o termina jogu primeira parte score mantein 1-0.
Kontinua ba jogu segunda parte ekipa kontinua hatudu ritmu jogu ne’ebe mak aas hodi lansa kontra atake ba malu.
Maibe sorti diak monu liu ba ekipa AD. S.L.B. hodi produs tan golu ida hodi hasae score ba 2-0 liu hosi jogador Kornelis Portela.
Futebolista ho numeru kamizola 11 ne’e marka golu hafoin simu assitensia bola pasagen hosi nia kompatriota iha linha iskerda.
Ho golu ne’e tensi jogu komesa manas liu tan no tama ba iha minutu 88 Academica Fc tenke joga deit ho jogador nain 10 hafoin kapitaun ekipa Academica Fc Joel Gaio hetan kartaun mean.
Maske nune’e la iha tan golu ruma mak akontese to’o termina jogu segunda parte vitoria ba AD SLB ho score 2-0.
Hosi rezultadu vitoria ne’e hatuur ekipa AD. S.L.B. okupa iha primeru tabela klasifikasaun primeira divizaun Liga Timorense ho pontus 7 hanesan ho assalam fc ne’ebe mak ho pontus 7.
Enkuantu ekipa Academica Fc tun ba pozisaun 4 ho Pontus 4 hosi jogu dala tolu manan ida derota ida no empata ida.
DVO
