DILI — Avansadu prinsipal Emmanuel Fc Edit Savio, hahu hatudu ninia kroat hodi produs golu rua, no susesu lori nia ekipa Emmanuel Fc, konkista vitoria ho score 2-1 kontra adversariu Atletico Ultramar/Coracão iha jogu kontinuasaun primeira divizaun jornada datoluk Liga Timorense epoka 2022-2023.
Jogu entre ekipa Atletico Ultramar/Coracao Fc, kontra Emmanuel Fc ne’e hala’o iha Estadion Munisipal Dili Domingu, (12/03) hahu jogu klubu Emmanuel Fc tun kedas ho ambisaun aas hodi lansa kedas atake ho nune’e jogu foin hala’o minutu ida Edit Savio susesu hatudu ona nia kroat hodi fura rede Ultramar Coracao Fc ne’ebe mak hein hosi Domingos Gama ho nune’e score muda aan sai 0-1.
Eis jogador Boavista Fc Timor no Aitana Fc ne’e marka golu liu hosi asaun kabesada hafoin simu assitensia bola kruza hosi nia kompatriota Mario Quintao iha linha iskerda.
Ho golu ne’e halo linha defensivu hosi Atletico Ultramar Coracao komesa hakfodak ho nune’e ekipa Emmanuel Fc kontinua ultrapasa ba defeza ho fasil maibe la konsege aproveita ho diak oportunidade Sira.
Atletico Ultramar/Coracao Fc foin halo balansu ba score sai 1-1 iha minutu 14 liu hosi asaun Rufino Gama.
Eis jogador Lalenok United ne’e marka golu hafoin simu assitensia bola livre ne’ebe mak suta hosi Yohanes Gusmao.
Ho golu ne’e ritmu jogu komesa manas liu tan no tama ba iha minutu 40 Edit Savio hamorin hikas nia naran hodi lori nia ekipa Emmanuel Fc lidera ho score 1-2.
Avansadu ho numeru kamizola 10 ne’e Marka golu hafoin simu assitensia bola pasagen iha linha kalaran hafoin Edit Savio aproveita hodi fura rede Atletico Ultramar Coracao Fc.
Ho score ne’e jogu komesa manas liu tan ba ekipa rua ne’e hodi lansa kontra atake ba malu maibe la iha tan golu ruma mak akontese to’o termina jogu primeira parte Ultramar Coracao 1- 2 Emmanuel Fc.
Kontinua ba segundu parte ekipa rua ne’e nafatin hatudu ritmu jogu hodi lansa kontra atake ba malu liu hosi tekniku no tatiku ne’ebe mak kada Treinador sira orienta.
Maibe defeza hosi ekipa rua mos solidu nafatin hodi la fo fatin ba avansadu sira hodi produs golu ho nune’e to’o termina jogu segunda parte score mantein 1-2 vitoria ba Emmanuel Fc.
Hosi rezultadu vitoria ne’e hatuur ekipa Emmanuel Fc Okupa iha segunda kalsifikasaun provizoriu ho pontus 6 hosi jogu haat manan rua no derota dala rua.
Enkuantu ekipa Atletico Ultramar/ Coracao Fc tun ba pozisaun 5 ho pontus 4 hosi jogu dala tolu manan ida empata ida no derota dala ida.
DVO
