DILI– Karketu Dili Fc susesu rekolla vitoria dahuluk iha Liga Timorense primeira divizaun epoka 2022- 2023, hafoin halakon adversariu As Ponta Leste ho score 2-1 iha terseiru jogu.
Duelo entre ekipa As Ponta Leste kontra Karketu Dili Fc ne’e hala’o iha Estadion Munisipal Dili Sabadu, (11/03).
Hanesan baibain iha inisiu jogu ekipa rua ne’e lansa kedas kontra atake ba malu liu hosi tekniku no tatiku ida idak maibe ekipa As Ponta Leste ne’ebe mak hatudu ritmu jogu ho diak liu hosi defensivu no ofensivu konsege fura uluk rede Armada Matak Malirin liu hosi jogador Espedito da Conceçao, iha minutu 24 hodi muda score sa’i ba 1-0.
Maske nune’e golu refere la dura to’o tempu naruk tanba tama ba iha minutu 34 armada matak malirin konsege responde hikas hodi halo balansu ba score sa’i 1-1, liu hosi jogador estranjeiru Mauricio Gonzales.
Ho score refere jogu sa’i manas liu tan ba ekipa rua ne’e hodi lansa kontra atake ba malu no tama ba iha minutu 44 Karketu Dili Fc lidera hikas ho 2-1, hafoin Agosto da Costa fura rede As Ponta Leste.
Ho golu ne’e la iha tan golu ruma mak akontese to’o termina jogu primeira parte score mantein lidera hosi Marketu Dili Fc.
Kontinua ba jogu segunda parte ekipa rua hotu hotu iha ambisaun hodi produs tan golu liu hosi kontra atake no tatiku ne’ebe mak treinador aprezenta.
Maske nune’e esforsu hirak ne’ebe ekipa rua ne’e halo hodi marka aumenta tan golu, maibe to’o termina jogu segunda parte la iha golu ruma mak akontese tan vitoria ba Karketu Dili Fc ho score 2-1.
Hosi rezultadu vitoria ne’e hasae muda ekipa Karketu ba iha pozisaun 7 ho pontus 3 hosi jogu tolu manan ida no derota rua.
Enkuantu ekipa As Ponta Leste tun ba iha pozisaun 9 ka ikus liu ho pontus 1 hosi jogu tolu derota rua no empata ida.
DVO
