Dili– Edit Savio kontinua hatudu ninia kroat liu hosi nia produtividade hamutuk ho Emmanuel Fc, hodi lidera top score Liga Timorense hamutuk ho jogador Yohanes Jehaman ho golu 3.
Yohanes Jehaman marka ona golu 3 ba nia klubu Fc Porto Taibesse. Hafoin iha jogu ikus Fc Portu Taibesi manan Assalam Fc ho score 3-0, futebolista ho nasionalidade Indonesia ne’e susesu marka golu rua.
Edit Savio mos marka ona golu 3 ba nia klubu Emmanuel Fc. Futebolista ho pozisaun avansadu orijen hosi munispiu Lautem ne’e kontribui golu rua hafoin Emmanuel Fc halakon nia adversariu Atletico Ultramar/Coracao ho score 2-1 iha jogu ikus.
Iha pozisaun datoluk sei nafatin hosi Fc Portu Taibesi Edencio Da Costa ne’ebe mak marka ona golu rua no mos Hasan Costa hosi Assalam Fc no ikus liu Juvinal Boavida hosi Academica Fc ne’ebe mak hotu hotu marka ona golu rua.
Enkuantu Mouzinho Barreto de Lima foin produs golu ida no Paulo Gally seidauk produs golu.
Entertantu Liga Timorense primeira divizaun dadaun ne’e lidera hosi AD SLB ho pontus 7 hosi jogu tolu manan rua no empata ida.
No Assalam Fc iha pozisaun daruak ho pontus 7 hanesan ho SLB maibe diferensia iha produtividade golu
DVO
