DILI– As Ponta Leste susesu rekoila pontus tolu tolu (3) iha jogu jornada da-haat Liga Timorense hafoin tidin nia adversariu Emmanuel Fc ho score 3-1, rezultadu vitoria ne’e hasai ekipa Ponta Leste hosi jona degradasaun.
Duelo entre ekipa rua ne’e hala’o iha Estadion Munisipal Dili tersa (21/03), iha inisiu jogu ekipa rua tun ho ambisaun aas hodi lansa kedas kontra atake ba malu.
Maibe ekipa As Ponta Leste ne’ebe mak foti imisiativa serang konsege halo presaun makas ba Emmanuel Fc ho nune’e tama ba iha minutu 21, Luis Ribeiro susesu lori Ponta Leste lidera ho score 1-0.
Futebolista ho numeru kamizola 7 ne’e marka golu liu hosi asaun kabesada hafoin simu assitensia bola kruza hosi nia kompatriota iha linha direta.
Ho golu ne’e jogu sa’i manas liu tan ba ekipa rua maibe la iha tan golu ruma mak akontese to’o termina jogu primeira parte As Ponta Leste lidera nafatin ho score 1-0.
Kontinua ba jogu segunda parte Ponta Leste komesa hatudu jogu furak liu hosi defensivu ne’ebe mak solidu no ofensivu ne’ebe mak akuransia ho nune’e tama ba iha minutu 64 Ricardo Bianco produs golu ida hodi haboot score ba 2-0.
Futebolista ho numeru kamizola 6 ne’e fura rede Emmanuel Fc liu hosi asaun kabesada hafoin simu assitensia bola kruza hosi nia kompatriota iha linha direta.
Ho golu ne’e halo ekipa Emmanuel Fc komesa sa’i hosi fatin hodi halo kontra atake maibe defeza hosi As Ponta Leste mantein solidu ho nune’e esforsu ne’ebe mak Emmanuel Fc halo seidauk bele rezulta golu.
No tama ba iha minutu 73 rede Emmanuel Fc nakdoko hikas hafoin Jaimito Soares hetan bola barulu iha area grandeal Emmanuel Fc hodi haboot liu tan score ba 3-0.
Ho golu ne’e jogu komesa manas liu tan ho nune’e tama ba iha minutu 75 Angelito Tilman susesu fura rede As Ponta Leste hodi hamihis score ba 3-1.
Ho golu ne’e halo ekipa Emmanuel Fc esforsu makas liu tan hodi lansa kontra atake ba As Ponta Leste maibe defeza hosi As Ponta Leste mantein linha metin hodi la fo ba Emmanuel Fc hodi produs golu ho nune’e too termina jogu segunda parte vitoria ba As Ponta Leste ho score 3-1.
Hosi rezultadu vitoria ne’e hasai ekipa Ponta Leste hosi jona degradasaun hodi okupa iha pozisaun da-hitu ho pontus 4 hosi jogu dala 4 manan ida empata ida no derota dala rua.
Enkuantu ekipa Emmanuel Fc mantein okupa iha pozisaun da-haat (4) ho pontus 6 hosi jogu dala lima (5) manan rua no derota tolu.
DVO
