DILI– Karketu Dili Fc rekoila pontus tolu hafoin hurlele nia adversariu Aitana Fc ho score 3-1 iha jogu kontinuasaun priemeira divizaun liga timorense jornada da-haat mak hala’o iha Estadion Munisipal Dili Kuarta (22/03).
Iha inisiu jogu hanesan baibain ekipa rua tun ho ambisaun boot hodi buka oportunidade atu bele produs golu liu hosi kontra atake ba malu ho nune’e jogu foin hala’o iha minutu 3 rede Aitana Fc nakdoko ona liu hosi asaun Paulo Gally.
Futebolista ho numeru kamizola 21 ne’e marka golu furak hafoin hetan bola barulu iha area grandeal Aitana Fc.
Ho score refere jogu sa’i manas liu tan ba ekipa rua Maibe linha defensivu hosi Aitana Fc ne’ebe mak ladun solidu halo ekipa Armada Matak Malirin aproveita hodi fura tan rede Aitana Fc ne’ebe mak komanda hosi Celestino da Costa hodi hasae score ba 2-0 liu hosi jogador Gelvanio Albero.
Avansadu ho numeru kamizola 10 ne’e fura rede Aitana Fc hafoin hatudu nia asaun hodi ultrapasa defeza Aitana.
Sofre golu rua Aitana Fc tenta hodi halo kontra atake maibe guarda defensivu hosi Armada Matak Malirin mantein solidu hodi la fo fatin ba Aitana Fc hodi produs golu ho nune’e to’o termina jogu primeira parte ekipa Karketu Dili Fc mantein lidera ho score 2-0.
Kontinua ba jogu segunda parte intensidade jogu komesa aas liu tan no tama ba iha minutu 52 Aitana Fc konsege hamihis score sa’i 2-1 hafoin jogador Zacarias Cabral halo auto golu.
Ho score refere jogu sa’i manas liu tan no tama ba iha minutu 58 defeza hosi Aitana Fc komete erru hodi fo suta livre ba Karketu Dili Fc.
No Paulo Gally ne’ebe mak sa’i ezekutor ba sutu livre ne’e susesu fura rede Aitana dala ida tan tanba bola ne’ebe nia suta tama direita hodi haboot score ba 3-1.
Score refere halo jogu sa’i manas liu tan ba ekipa rua maibe to’o termina jogu segunda parte la iha golu ruma mak akontese ho nune’e vitoria ba Karketu Dili Fc ho score 3-1.
Hosi rezultadu vitoria ne’e lori ekipa Karketu Dili Fc sa’i hosi jona degradasaun hodi okupa iha kuartu klasifikasaun ho pontus 6 hosi jogu dala 4 manan rua no derota rua.
Enkuantu ekipa Aitana Fc tun ba iha jona degradasaun ho pontus 4 hosi jogu dala 4 manan ida empata ida no derota dala rua.
DVO
