DILI — AD SLB falla hodi save metin pontus 3 hafoin empata kontra Fc Portu Taibesse ho score 1-1 iha jogu kontinuasaun primeira divizaun Liga Timorense mak hala’o iha Estadion Munisipal Dili Sexta (24/03).
Jogu foin hala’o minutu 14 AD SLB lidera ona ho score 1-0 liu hosi asaun Alexandre Ima Kefy, hafoin hetan asistensia bola kruza hosi Mouzinho Barreto de Lima.
Sorte aat AD SLB foin mai iha minutu 90+5 hafoin Filipe Oliveira hamonu Yohanes Jehaman iha area grandeal ho nune’e arbitu deside hodi fo paenaltu ba Fc Portu Taibesse.
Edencio Da Costa ne’ebe mak hetan fiar hodi sa’i ezekutor ba penalidade refere lakohi husik leet deit no susesu fura rede AD SLB hodi halo score sa’i 1-1.
Ho golu ne’ebe mak akontese iha minutu ikus ne’e Treinador AD SLB, Juliao Monteiro, fo sala ba jogador tanba lidera ona maibe lakohi halo defensivu hodi halo Fila fali ofensivu iha minutu ikus.
“Minutu ikus ne’e ami nia defeza kotuk la iha balansu ne’ebe diak tanba ha’u haree defeza karuk sae liu tiha hela minutu ikus asegura tempu ne’e ho diak lae? hakarak halo atake ba tanba saida tenke halo atake? tanba mantein deit pozisaun sei seguru liu tan maibe foti desizaun hakarak sae mak fatin ne’e kuak tiha ” dehan Treinador Juliao.
DVO
