DILI– Asosiasaun Despotiva Sporting Laulara Benifika AD. S.L.B. falla hodi save metin pontus 3 hafoin empata ho score 1-1 kontra Fc Porto Taibesse iha jogu kontinuasaun primeira divizaun Liga Timorense jornada da-haat ne’ebe mak hala’o iha Estadion Munisipal Dili Sexta (24/03).
Iha inisiu jogu ekipa rua ne’e hotu hotu tun ho ambisaun aas hodi lansa kontra atake ba malu maibe ekipa AD. S.L.B. ne’ebe mak domina liu bola desde inisiu konsege lidera uluk ho score 1-0, liu hosi Alexandre Ima Kefy iha minutu 14.
Atakante ho numeru kamizola 21 ne’e marka golu hafoin simu assitensia bola kruza hosi nia kompaineru Mouzinho Barreto de Lima iha linha iskerda.
Ho golu ne’e tensi jogu komesa sae makas liu tan ho nune’e tama ba iha minutu 18 AD. S.L.B. tenke joga deit ho nain 10 hafoin kapitaun AD. S.L.B. Mouzinho Barreto de Lima hetan kartaun kinor ba daruak.
Menus jogador ida Fc Portu Taibesse tenta hodi marka golu liu hosi tatiku hosi ain ba ain maibe defeza hosi SLB mantein solidu ho nune’e to’o termina jogu primeira parte AD SLB mantein lidera ho score 1-01.
Kontinua ba jogu segunda parte intensidade kontinua manas Fc Portu Taibesse ne’ebe sofre uluk golu tenta nafatin fo presaun makas ba AD. S.L.B. maibe defeza hosi AD. S.L.B. mantein linha metin hodi la fo fatin ba AD. S.L.B. hodi marka golu.
AD. S.L.B. ne’ebe mak joga deit ho nain 10 ladun hetan oportunidade ne’ebe mak efektivu no Tama ba iha minutu 83 Fc Portu Taibesse tenke lakon jogador ida hafoin arbitu Pedro Carvalho hasai kartaun kinor daruak ba Federico Silva.
Ho menus jogador ne’e halo jogu sa’i balansu maibe ekipa SLB ne’ebe mak mantein desizaun hodi halo defensivu barak liu no tau deit jogador nain rua iha oin hodi aproveita Counter Atake.
Sorti aat AD. S.L.B. akontese iha minutu 90+5 hafoin Filipe Oliveira hamonu Yohanes Jehaman iha area grandeal ho nune’e arbitu deside hodi fo paenaltu ba Fc Portu Taibesse.
Iha penalidade Edencio Da Costa ne’ebe mak sa’i ezekutor ba penalidade refere susesu fura rede AD. S.L.B. ne’ebe mak hein hosi Filonito Nogueira hodi muda score sa’i 1-1 hodi termina kedas jogu .
Hosi rezultadu empata ne’e lori AD. S.L.B. dudu sees Assalam Fc hodi ukun hiakas ho Pontus 8 hosi jogu 4 Manan rua no empata rua.
Enkuantu ekipa Fc Portu Taibesse mantein iha pozisaun datoluk iha tabela klasifikasaun primeira divizaun ho pontus 7 hosi jogu dala haat manan rua empata ida no derota dala ida.
DVO
