DILI– DIT Fc kontinua ukun tabela klasifikasaun segunda divizaun Liga Timorense hafoin hurlele nia adversariu Santa Cruz Fc ho score 5-2.
Hala’o jogu iha stadion Munisipal Dili iha inisiu jogu primeira parte ekipa rua hatudu jogu intensidade ne’ebe mak aas desde inisiu maibe ekipa DIT Fc ne’ebe mak hatudu liu ritmu jogu konsege domina bola hodi lansa suta fila fila ba rede Santa Cruz Fc ho nune’e Tama ba iha minutu 23 DIT konsege fura ona rede Santa Cruz Fc liu hosi asaun Romario Moniz.
Liu deit minutu rua DIT hasae tan score sa’i 2-0 liu hosi asaun Jose dos Santos, avansadu ho numeru kamizola 7 ne’e fura rede Santa Cruz Fc liu hosi suta dook.
La para deit iha ne’e DIT fura tan rede Santa Cruz Fc hodi haboot liu tan score sa’i 3-0, liu hosi jogador Serafim Brito iha minutu 45 hodi taka jogu primeira parte ho score 3-0.
Kontinua ba segunda parte tensi jogu komesa manas liu tan maibe ekipa Santa Cruz Fc ne’ebe mak sofre uluk golu tolu desde priemeira parte konsege marka golu rua tuir malu liu hosi jogador Paulo Godinho iha minutu 51 no Arsenio Amaral iha minutu 53 hodi muda score sa’i 3-2.
No tama ba Iha minutu 62 Romario Moniz hamorin hikas nia naran hodi lori nia ekipa DIT Fc lidera ho score 4-0.
No tama ba iha minutu 75 rede Santa Cruz nakodoko tan Dala ida hafoin Elvis Silva aproveita bola barulu iha area grandeal Santa Cruz Fc hodi haboot liu tan score sa’i 5-2.
Ho score refere jogu sa’i manas liu tan maibe la iha tan golu ruma mak akontese to’o termina jogu segunda parte vitoria ba DIT Fc ho score 5-2.
Hosi rezultadu vitoria ne’e lori ekipa DIT Fc kontinua ukun provizoriu tabela klasifikasaun segunda divizaun Liga Timorense ho pontus 10 hosi jogu 4 Manan dala tolu no empata ida.
DVO
