DILI– Atu hatudu prestasaun diak iha Sea Games persija treinu ho diak no konsumu ai-han ne’ebe mak nutritivu, maibe durante ne’e atleta sira ne’ebe mak iha kajerna Polisia Militar atu ba kompete iha Sea games ba edisaun 32 iha Kambodia ne’e han deit etu maran no modo ne’ebe nakonu ho mina, ironiu liu tan han mostarda mutin ne’ebe tau ai-manas.
“Ami atleta hasai energia ne’ebe barak no ami persija alimentasaun ne’ebe diak mais durante ne’e ami han maran deit no modo ne’ebe nakonu ho mina no diak ida tahu sira lori mai ne’e meer los no diak ida modo mostarda sira fila ho ai-manas ne’e ha’u sente ladun diak sira tenke haree didiak ba alimentasaun ne’e” dehan Boxista Edgar Foe Quintas lekar sa’i ba jornalista hafoin hala’o treinu iha El-Matador Dili, Tersa (28/03)
Boxista ne’e afirma, dadaun ne’e sira hela kazerna lakohi ka hakarak sira tenke han tanba durante sira treinu dader no lokraik sira treinu makas tebes sira persija buka fali enerjia ne’ebe sira hasai nune’e sira persija han nafatin maske diak ou la diak sira tenke han.
Hosi Sorin Treinador selsaun nasional Boxe Abilio Orlando Dos Santos, afirma, probema ida ne’e sira laos foin mak koalia maibe sira hato’o ona iha semana rua liu ba kotuk problema hahan la diak tanba Boxista sira dalaruma sira han modo been la iha, Han mostarda mutin, Ayam Porong, ne’e la diak ba atleta sira nia saude.
Nia dehan, Perkupasaun ne’e sira hato’o ona ba FBATL no halo ona komunikasaun ho CDTL maibe ladaukw hetan rezultadu.
“Ha’u hanoin ita tenke hadia ai-han ba atleta sira” nia tenik.
“Hahan dalaruma sira han Ayam Potong dalaruma modo been la iha, naan mos diak ida iha maibe oituan hanesan ne’e deit mak teoka ba mai”
“Ha’u rona hosi CDTL rasik dehan katak $18 centavus 75 kada ema ida loron ida” nai hatete
Enkuantu Sea games ba edisaun 32 ne’e sei hala’o iha fulan Maiu tinan ne’e iha Kambodia.
Hosi Modalidade Boxe sei reprezenta atleta selesionadu naine 5 mak hanesan Delio Anzaqeci Mouzinho, Alexandre Freitas, Edgar Quintao, Eligio Gayo, no Elidio da Conceicao.
Realasina ho asuntu ne’e JHD tenta ona halo komfirmasaun ba prezidente CDTL maibe prezidente la iha fatin.
DVO
