DILI– Asosiasaun Desportiva Sporting Benifika Laulara kontinua lidera tabela klasifikasaun primeira divizaun Liga Timorense hafoin halakon nia ekipa Assalam Fc ho score mihis 2-1.
Jogu kontinuasaun Liga Timorense jornada da-lima ne’e hala’o iha Estadion Munisipal Dili kinta (30/03), iha inisiu jogu primeira parte maske ekipa SLB hala’o jogu sein avansadu prinsipal Mouzinho Barreto de Lima, maibe sira nafatin ho ambisaun nune’e tun kedas ho presaun ne’ebe makas no jogu foin mak hala’o deit minutu Ida rede Assalam Fc nakdoko ona liu hosi jogador Michel Hutambart.
Ho golu sedu ne’e halo jogu komesa manas hodi anima tebes adeptus sira ne’ebe mak asiste direta iha jogu refere.
No tama ba iha minutu 39 Assalam Fc konsege responde golu ida liu hosi asaun Martinho Belo hodi halo balansu ba score sa’i 1-1.
Extremu ho numeru kamizola 33 ne’e marka golu hafoin simu assitensia bola pasagen hosi nia kompatriota Elias Meskita.
Score refere la dura to’o kleur tanba tama ba iha minutu 45+1, Zenivio Mota marka golu ida hodi lori nia ekipa AD SLB lidera ho score 2-1.
Avansadu ho numeru kamizola 7 ne’e fura rede Assalam Fc hafoin hatudu nia asaun hodi ultrapasa ba defeza Assalam Fc.
Score refere mantein to’o apitu lian hodi termina jogu primeira parte AD SLB lidera ho score 2-1.
Kontinua ba jogu segunda parte intensidade jogu komesa manas liu tan ba ekipa rua ne’e hodi lansa kontra atake ba malu maibe la iha golu ruma mak akontese iha jogu segunda parte to’o termina jogu vitoria ba AD SLB ho score 2-1.
Hosi rezultadu vitoria ne’e hatuur ekipa AD SLB mantein ukun provizoriu iha tabela klasifikasaun Liga Timorense priemeira divizaun ho pontus 11 hosi jogu dala lima manan dala tolu no empata dala rua.
Enkuantu ekipa Assalam Fc mantein iha pozisaun daruak ho pontus 8 hosi jogu dala neen manan dala rua empata dala rua no derota dala rua
DVO
