DILI– Governu liu hosi Sekretariu Estadu Joventude no Despotu (SEJD) hamutuk ho Embaixador Cuba iha Timor-Leste, selebra aniversariu bilateral ba dala 21 ho atividade desportiva from Cayman to Cayman.
Aniversariu koperasaun bilateral Timor Leste ho Cuba ne’e, Cuba hala’o eventu Despotivu oioin hodi selebra tinan 21 Lasu Amizade no explora dalan ida hodi hametin liu tan relasaun amigável ida ne’e.
Atividade hahu ho lao ain hosi Embaixada Cuba to’o iha resintu SEJD nune’e mos iha atividade desportu maka jogu Xadres, Tenis mesa, Kickimbol, Voleybol rekreativu,Boxing no mos Futsal Funsaun Publika nian.
Iha intervista Sekretariu estadu Juventude no Desportu Abrão Saldanha informa, III festival cayman ba cayman hanesan illa ida neebe hanesan lafaek ida no kuba nia forma nee mos hanesan lafaek nian, tamba nee mak sira forma ba cayman ba cayman.
Nia dehan Festival ida nee organija desportu rekreativa maka lao ain no desportu oioin atu prepara fisika no mental diak liu ba saude tanba Festival nee foti hodi komemora loron 21 ba koperasaun entre Cuba no Timor-Leste nunee mos selebra loron Che-Guevara nian ba tinan 95 no loron moris nian.
“Ita hotu hatene katak desde Cubano ho Timor-Leste iha relasaun ida neebe forte tebes, desde Timor-Leste hahu independensia Cuba mos solidariza ba ita nia luta, sira mai ho sira nia bata mutin mai iha TL too iha suku no aldeia, hahu estabelese Sistema saude no forma Timor oan sira rihun ba rihun iha professional saude sira hodi ajuda ita no kombate moras iha Timor-Leste,”Dehan Sekretariu Estadu Ba Jornalista iha Edifisiu SEJD Lecidere, Sabadu(17/06/2023).
Nia haktuir sira loke mos fakuldade medisina iha UNTL no mos hahu kampana analfabetizasaun iha arte no kultura inklusivamente desportu.
Nia Akresenta Desportu sira mai agora nee ho profesionais sira hamutuk nain 6 iha UNTL hodi hanorin ba faculdade Edukasaun fizika no desportu nian
Halo estajiu ba komunidade no labarik sira, ferik katuas sira iha becora, ba sira ne’ebe mak uluk hetan moras hipertensaun no struck.
Nia salienta Festival ba caiman-caiman nee mos iha atividade desportu maka jogu xadres, tenis meza, kickimbol, voleybol rekreativu,Boxing no mos futsal funsaun publika nian.
Iha fatin hanesan Ministra Saude Odete Maria Viegas informa nia partisipa atividade Cayman to Cayman nee ba dalarua nia parte agradese tebes ba SEJD nian neebe mak servisu hamutuk ho Brigada Cuba sira iha TL.
“Atividade Cayman to Cayman ida nee ita halo hanesan ita selebra loron Cuba nia Eroi ida Che-Guevara entaun ita halo atividade ida nee tanba ita espera katak atividade ida nee bele sai hanesan rutina regular ida ba instituisaun hotu-hotu laos insidental ida ne’e mak ita hakarak,”dehan nia
Entertantu Partisipa husi atividade nee mak Minsitra Saude, Embaixadora Portugal, embaixador Xina, Embaixadora Cuba, Reprezentante UN iha Timor-Leste, Diretor jeral Juventude no Desprotu, Xefe Gabinete SEJD, estudante Sekundaria, estudante III siclu no mos komunidade Cuba
JHD