DILI– Klubu segunda divizaun Maudoko Fc, sei rekruta jogador estranjeiru nain rua hosi nasaun vizinhu Indonesia hodi kompete iha Liga futsal Timor Leste epoka 2023.
Informasaun ne’e relata hosi konsileru klubu Maudoko Fc, Elizeu Isac ba jornalista sira iha nia rezidensia Manleuana Dili, sexta (23/06/2023).
Konsileru klubu Maudoko Fc ne’e haktuir, hafoin enkontru entre klubu sira ho AFTL iha loron 7 fulan junnu liu ba ne’ebe deside Liga futsal atu abertura iha loron 04 fulan agustu tinan ne’e estrutura klubu deside hodi orienta kedas treinador hodi halo kedas perparasaun treinamentu fiziku hodi rekopera jogador sira nia fiziku.
Nia dehan, dadaun ne’e total jogador hamutuk nain 22 mak hala’o perparasaun treinamentu fiziku maibe parte klubu sei halo selesaun ba jogador hirak ne’e hodi eskoila jogador diak hodi ba rejistu iha AFTL hodi kompete iha Liga futsal segunda divizaun epoka 2023.
“Komunikasaun entre estrutura klubu prontu atu rekruta jogador estranjeiru maibe sei haree ba serteza hosi Liga ne’e fixu, hanesan ita tama ona ba teknikal meeting ne’e ita prontu hatama jogador estranjeiru hosi Indonesia ne’e lalais deit” katak nia
“Planu sei hatama jogador nain rua mak mai maibe fila fali ba ita nia perparasaun ne’e kuandu ita haree mais ou menus pozisaun ou jogador ho tipu oinsa mak ita atu foti prontu ha’u hanoin katak haree lai perparasaun ne’e oinsa parte tekniku rekomemda estranjeiru atu tama ba” nia akresenta.
Nia dehan, parte klubu seidauk bele fo sa’i jogador nain rua ne’e hosi klubu ne’ebe tanba seidauk iha konkordansia maibe kuaze iha Jakarta Indonesia
“Optimista ita optimista, oinsa bele ba priemeira divizaun ne’e parinsipiu maibe ita mos sei haree lai klubu sira seluk nia jogador ne’e” tenik nia
Enkuantu janela transferensia ba jogador AFTL loke komesa hosi loron 12 fulan junnu no sei termina iha loron 29 fulan agustu tinan ne’e.
Antes ne’e liu hosi desizaun koletivu entre klubu ho AFTL deside Liga futsal Timor Leste sei abertura iha loron 04 fulan Agustu tinan ne’e.
Total klubu hamutuk 24 kompostu hosi priemeira divizaun 10 no segunda divizaun hamutuk 14.
JHD
