DILI — Jogador selsaun nasional Timor Leste Zenivio Mota, nia mehi hakarak joga iha rai liur sa’i realidade hafoin hetan kontratu hosi Klubu priemeira divizaun hosi nasaun Kambodia ho naran Kirivong sok Sen Chey Fc.
“Primeiru ida ne’e mak hau nia mehi hakarak joga fora husi nasaun hodi bele halo historia Ida mai hau nia moris no mos ba nasaun I ha’u mos senti kontenti tamba bele hetan ona opurtunidade ida ne’e hodi atinje ha’u nia mehi” dehan futebolista Timoroan Zenivio Mota ba JHD via whatsApp Domingu (02/07).
Eis jogador AD SLB ne’e hatete, nia iha esperansa ne’ebe boot hakarak lori nia klubu atual ne’e sa’i vensedor iha Liga Kambodia.
Jogador joven ho idade 18 ne’e hatete, ho esperensia ne’ebe mak nia hetan iha Kambodia nia prontu atu kontribui masimu ba selesaun karik hetan fiar hosi Treinador hodi haforsa ekipa nasional ba kompete.
“Ba hau nia ekipa selesaun hau sei entrega saida mak hau iha no kualidade ne’ebe mak iha hodi bele halo mudansa iha ekipa” dehan Zenivio.
Nia haktuir, dadaun ne’e hala’o ona treinamentu ho nia ekipa Kirivong sok Sen Chey Fc no hala’o ona friendly Match
Tuir Kalendariu Liga priemeira divizaun Kambodia sei komesa iha fulan agustu tinan ne’e.
Bio data badak hosi Zenivio Mota.
Zenivio Mota hahu hala’o treinu iha Futebol iha tinan 2015-2016, iha Academi Centro FFTL.
Iha tinan 2017 Zenivio Mota hahu hetan fiar hodi reprezenta selesaun nasional sub-12 dala tuir malu no konsege sa’i Best Player iha eventu MBC sub-12 hasoru nasaun sira Europa.
Iha tinan 2018 Zenivio Mota nafatin hetan fiar hodi haforsa ekipa nasional sub-16.
No iha tianan 2019, depois de haforsa selesaun ba joga iha liur dada kedas atensaun klubu priemeira divizaun AD SLB hodi kontratu kedas Zenivio Mota, hodi kompete iha Liga Futebol Amadora (LFA) epoka 2019 to’o 2023.
No iha tinan 2021, jogador foin sae ne’e hetan fiar hosi Treinador Fabio Maciel hodi haforsa selesaun nasional sub-23 no selesaun nasional senior iha Singapore.
JHD
