DILI– Asosiasaun Futebol sira lakon ona konfiansa ba Prezidente Federasaun Futebol Timor-Leste (FFTL) Francisco da Costa Pereira Jeronimo, ho nune’e asosiasaun 16 deside ho dalan kongresu extraoridinariu, hodi troka prezidente FFTL atu salva futebol.
Kongresu anual Federasaun Futebol Timor Leste (FFTL) ba dala ualu ne’ebe mak realiza iha otel novu turizmu, sabadu, (01/07/2023). Asosiasaun Futebol hamutuk 16 deside atu halo kongresu extraoridinariu tanba la iha ona konfiansa ba Prezidente FFTL ne’ebe mak la kumpri nia promesa iha kongresu extraoridinariu ba dala hitu ne’ebe mak hala’o iha fulan Fevreiru 2022.
Iha kongresu extraoridinariu FFTL bá da-hitu iha loron 26 fulan-Fevereiru 2022 iha Otel Novo Turizmu, ne’ebe mak partisipa mos hosi reprezentante FIFA no AFC ne’e Francisco Jerónimo re-eleitu nu’udár prezidente FFTL bá períodu 2022-2026, hafoin manan kandidatu forte rua seluk mak Nilton Gusmao no Francisco Kalbuadi Lay.
Iha prosesu eleisaun ba kargu prezidente ne’e tanke hala’o dala rua, hafoin la iha kandidatu ida mak hetan votus maioria. Ho votus 5 ne’ebe mak Francisco Kalbuadi Lay hetan deside retira hodi fo oportunidade ba Francisco Jeronimo ho votus 9 no Nilton Gusmao ho votus 7 avansa ba segunda ronda.
No iha segunda ronda ne’e Fransisco Jeronimo hetan fiar hodi lidera FFTL ho votu 11 no nia adversariu Nilton Telmo Gusmao Santos hetan votu 10 iha votasaun segunda ronda.
Hafoin re-eleitu nuudar prezidente FFTL iha tempu ne’eba Francisco Jeronimo promete katak sei kontinua ho programa ne’ebe mak durante nia trasa ona hodi kontinua hakbesik futebol to’o iha baze.
Maibe promesa murak ne’e hela deit promesa falsa nune’e Asosiasaun sira ezizi atu halo Kongresu Estraordináriu liu hosi votasaun ba alterasaun ajenda Kongresu Ordináriu FFTL ba dala-ualu ne’ebe mak hala’o iha Otel Novo Turizmu.
No iha prosesu votasaun ne’e asosiasaun sira maioria ho votu 16 mak deside alterasaun ba ajenda no iha deit asosiasaun 5 mak a-favor ba ajenda kongresu.
Hafoin kongresista sira maioria propoin ba kongresu extraoridinariu prezidente FFTL Francisco Jeronimo mos aprova kedas kongresu extraoridinariu ho nune’e kongresu Ordináriu FFTL bá dala-ualu la kontínua. No sei hein komunikasaun hosi parte ezekutivu FFTL ho FIFA mak sei anúnsiu ba Asosiasaun sira, no tuir estatutu FFTL artigu 33, prazu bá Kongresu Estraordináriu iha loron 90 ka fulan tolu nia laran.
Liu hosi entervista ho Portavoz Asosiasaun ba asosiasaun 16, Hipolito Soares, informa, asosiasaun sira hakarak halo mudansa ba iha estrutura FFTL ho nune’e dalan Uniku Mak liu hosi kongresu extraoridinariu.
Portavoz ne’e salienta, sira la iha Ona konfiansa ba Prezidente Federasaun Futebol Timor-Leste Francisco Jeronimo tanba ne’e mak liu dois tersu 2/3.
“ Klaru ami liu dois tercos mak proposta katak ami hakarak kongresu extraoridinariu artigu 33 katak ida Ami hakarak kongresu extraoridinariu, segundu mak ami nia proposta iha ne’eba hakerek klaru katak sira tenke konvida membru onorariu sira maibe momentu nee sira la halo tanba ne’e mak ami hatama tan Karta ami halibur hamutuk ita vota ba alterasaun ajenda depois proposta kongresu extraoridinariu, ita hein deit kongresu extraoridinariu ne’ebe mak FIFA sei deside ba Federasaun”nia informa.
Nia afirma, asosiasaun nuudar responsavel ba futebol tenke halo mudansa se nonok deit publiku hatene katak asosiasaun sira mak vota ne’ebe sira ho dalan legal para halo mudansa nemak ohin loron ami hakarak mudansa dalan liu hosi dalan kongresu extraoridinariu.
“Ami sei follow-up tanba tuir artigu 33 mos mensiona klaru katak lolos ne’e nomeasaun ami mak halo bele um tecus deit mos kongresu bele akontese se sira la halo ami rasik sei halo ne’e tuir estatutu mak koalia ne’e klaru ami mos sei la nonok tanba ita hotu Ema bola se la iha mudansa Ita mos halo follow-up ba FIFA no AFC” tenik nia.
Entertantu Asosiasaun sira ne’ebe mak partisipa iha kongresu Ordináriu FFTL bá dala ualu ne’e mai husi Asosiasaun Futebol husi Munisipiu hamutuk 12 inklui RAEOA, Asosiasaun Arbitrajen, Asosiasaun Futebol Femenino, Asosiasaun Treinadór, Asosiaun Sentru Juveníl, Asosiasaun Futsal, Kampeaun segundu divizaun (DIT Fc) ho Kampeaun primeira Divizaun (Karketu Díli Fc) epoka 2022.
JHD
